पोखरा । पातञ्जल योग समिति नेपाल गण्डकी प्रदेशको आयोजनामा ‘सर्वाङ्गिण विकासका लागि योग’ भन्ने मुल नाराका साथ सातौँ राष्ट्रिय योग दिवस मनाइएको छ ।

कार्यक्रमको उद्घाटन गण्डकी प्रदेश सभासभा सदस्य मिना गुरुङले गरिन् । उनले यूवाहरुलाई यस क्षेत्रमा आकर्षण गर्नुपर्ने बताइन् । आफू योग साधक पनि भएको भन्दै पातञ्जल योग समिति नेपाल गण्डकी प्रदेशलाई आफूले व्यक्तिगत रुपमा र प्रदेशको तर्फबाटपनि योग सम्वन्धी संस्थाहरुलाई सहयोगका लागि पहल गर्ने प्रतिवद्धता व्यक्त गरिन् । उनले योगलाई घरपरिवार र छरछिमेकलाई समेत यसलाई बुझाउन नसकिएको बताइन् ।

कार्यक्रममा शिक्षा, संस्कृती, विज्ञान, प्रविधि तथा सामाजिक विकास मन्त्रालयका उपसचिव भोजराज न्यौपानेले योग नृत्यको पहिलोपटक अनुभुती गरेको बताउँदै शिक्षा मन्त्रालयले यस कार्यक्रमबाट योग सम्बन्धि धेरैनै जानकारीमुलक कुराहरु प्राप्त गर्ने बताए ।

गण्डकी प्रदेश खेलकुद परिषद, पोखराका बोर्ड सदस्य योगेन्द्र शेरचनले खेलकुद क्षेत्रमा पनि योगलाई फैलाउनुपर्नेमा जोड दिए ।

यस्तै यूवा विभाग प्रमुख कमला गुरुङले पातञ्जल योग समिति नेपाल र योग दिवसको महत्वका बारेमा चर्चा गर्दै योगको बारेमा मानिसहरुलाई शिक्षा र जनचेतना फैलाउन पातञ्जलले विभिन्न क्षेत्रसंग मिलेर धेरैनै प्रयास गरिरहेको बताए ।

त्यस्तै कार्यक्रममा केन्द्रिय सदस्य तथा पातञ्जल कास्की जिल्ला संरक्षक डा. कृष्ण केसीले हिमालय पर्वत, जनकपुर र लुम्बिनीबाट नेपालमा योगको उत्पत्ती र विकास भएको चर्चा गरे ।

कार्यक्रममा करिना गुरुङ, मनिषा परियारबाट विभिन्न योग आसनहरु, खुशी अर्यालबाट एकल योग योग नृत्य, विभिन्न योग केन्द्रका सिता पौडेल , संगिता पराजुली, रुपा पाण्डे, संगिता थापा, मिना गुरुङ लगायतले योग आसनहरु, माउण्ट अन्नपूर्ण मा.विका आस्था गुरुङले राष्ट्रिय गितमा नृत्य गरेका थिए । स्वास्थ्य मापदण्डलाई मध्यनजर गर्र्र्दै सहभागीलाई कम उपस्थित गराइएको आयोजक पातञ्जल गण्डकीले जनाएको छ ।

कार्यक्रम पातञ्जल योग समिति नेपाल गण्डकी प्रदेश आश्रमका रश्मी भण्डारीको अध्यक्षतामा सम्पन्न भएको थियो ।