पोखरा र काठमाडौं उपत्यकासहित मुलुकका अधिकांश स्थानमा मंगलबार रातीदेखि देशभर वर्षा भएको छ । उच्च पहाडी तथा हिमाली भूभागमा हल्का हिमपात पनि भइरहेको मौसम पूर्वानुमान महाशाखाले जनाएको छ ।

पश्चिमी न्यून चापीय प्रणाली सक्रिय बनेसँगै वर्षा भएको छ । उच्च पहाडी र हिमाली भेगमा मात्र होइन काठमाडौँका डाँडामा पनि हिउँ परेको छ । काठमाडौँमा मंगलबार वर्षा नभए पनि बुधबार बिहान काठमाडौँमा १०.७ मिलिमिटर वर्षा भएको महाशाखाले जानकारी दिएको छ ।

महाशाखाको ताजा विवरण अनुसार पोखरामा ६.५, दिपालयमा १२, डडेलधुरामा १२.२ र धनगढीमा २ मिलिमिटर वर्षा भएको छ । त्यस्तै, सुर्खेतको वीरेन्द्रनगरमा ५, नेपालगन्जमा २, जुम्लामा २.६ र घोराहीमा ०.६ मिलिमिटर, भैरहवामा १२.६, सिमरामा १३, ओखलढुङ्गामा ३ र ताप्लेजुङमा १२.३ मिलिमिटर वर्षा मापन भएको छ । अहिले पनि फाट्टफुट्ट वर्षा भइरहेको छ ।

बिहीबार भने मौसममा केही सुधार आउने अपेक्षा गरिएको छ । यद्यपि थोरै स्थानमा हल्का वर्षा र उच्च पहाडी तथा हिमाली भूभागका केही स्थानमा हल्कादेखि मध्यम हिमपातको सम्भावना छ ।