काठमाडौं । वर्षा र खराब मौसमका कारण आन्तरिक उडान प्रभावित भएको छ । कास्कीको पोखरा विमानस्थलसहित बाँकेको नेपालगञ्ज र सोलुखुम्बुको लुक्लामा उडान हुन सकेको छैन । पोखरामा ३ हजार मिटर भिजिबिलिटी छ ।

भिजिबिलिटी कम भएका कारण आन्तरिक तर्फका ३ वटा विमानस्थलमा उडान हुन नसकेको त्रिभुवन अन्तर्राष्ट्रिय विमानस्थल नागरिक उड्डयन कार्यालयका महाप्रबन्धक भोला प्रसाद गुरागाईले बताएका छन् ।

अन्तर्राष्ट्रिय उडानमा समस्या छैन । लुक्लामा ५ सय मिटर मात्रै भिजिबिलिटी छ । डोल्पा, सिमिकोट लगायतका स्थानका सबै उडान पछि पछि रद्ध गरिएको छ ।

विमानस्थल कार्यालयका अनुसार पोखरा र नेपालगन्जको मौसम खराब भएका कारण ती स्थानहरुमा पनि जहाजहरु उड्न सकेका छैनन् । अन्य गन्तव्यको उडान पनि ढिलो भएको छ ।

सिमराबाट काठमाडौंका लागि उडेको एती एयरलाइन्सको एक जहाज मकवानपुर क्षेत्रको आकासमा केहीबेर फन्को मारेर काठमाडौं विमानस्थलमा अवतरण गरेको छ ।