काठमाडौँ । काठमाडौँको रत्नराज्यलक्ष्मी (आरआर) क्याम्पसमा चिट चोर्न नदिएको भन्दै शिक्षकमाथि कुटपिट गर्ने विद्यार्थी क्याम्पसबाट निष्कासित भएका छन् ।

गएको मङ्गलबार स्नातक तह प्रथम वर्षको आन्तरिक परीक्षा चलिरहेको बेला स्नातक तह दोस्रो वर्षमा अध्यनरत विद्यार्थी कुवेर जेठाराले परीक्षाहलभित्र प्रवेश गरी शिक्षक प्रकाश पुडासैनीमाथि कुटपिट गरेका थिए । कुटपिटबाट शिक्षक पुडासैनी घाइते भएका थिए । त्यही घटनालाई लिएर बिहीबार क्याम्पस प्रशासनले विज्ञप्ति निकाल्दै ती विद्यार्थीलाई क्याम्पसबाट निष्कासित गरिएको जनाएको हो ।

क्याम्पस प्रशासनले निकालेको विज्ञप्तिमा भनिएको छ, ‘परीक्षासँग असम्बन्धित विद्यार्थी कुवेर जेठाराले परीक्षा हलभित्र प्रवेश गरी निरीक्षक प्राध्यापकमाथि साङ्घातिक आक्रमण गरेको र क्याम्पसको शैक्षिक वातावरणमा खलल पुर्‍याएको विषयमाथि क्याम्पस प्रशासनको गम्भीर ध्यानाकर्षण भएको छ । ती विद्यार्थीलाई क्याम्पसबाट निष्कासन गरिएको र कानुनी कारबाही अगाडि बढिसकेको छ ।’