काठमाडौँ । साफ यू–१९ महिला फुटबल च्याम्पियनसिपको दोस्रो खेलमा नेपालले श्रीलंकालाई हराएको छ।

बंगलादेशको ढाकास्थित शहिद सिपाही मुस्तोफा कमल स्टेडियममा भएको खेलमा बुधबार नेपालले श्रीलंकालाई ६–० गोलको फराकिलो अन्तरले हराएको हो ।

नेपाललाई जित दिलाउन रश्मी कुमारी घिसिङले दुई तथा सबिता राना मगर, मेनुका कुमारी आले मगर, सलोनी राना मगर र रजनी थोकरले एक/एक गोल गरेका थिए ।

यस जितसँगै जारी च्याम्पियनसिपमा नेपालले पहिलो जित दर्ता गरेको छ ।

पहिलो खेलमा बराबरी खेलेको नेपालले दुई खेलबाट ४ अंक जोडेको छ। नेपाल दोस्रो स्थानमा रहेको छ ।

पहिलो खेलमा नेपालले आयोजक बंगलादेशसँग गोलरहित बराबरी खेलेको थियो ।

श्रीलंकाको भने यो लगातार तेस्रो हार हो। श्रीलंका अंकविहीन छ।

नेपालले तेस्रो खेल पुस २ गते भुटान र अन्तिम खेल पुस ४ गते भारतसँग खेल्ने छ । राउन्ड रोबिनको आधारमा हुने प्रतियोगितामा ५ टीमको सहभागिता रहेको छ ।

शीर्ष दुई टोली फाइनलमा प्रवेश गर्ने छन्। फाइनल खेल डिसेम्बर २१ मा हुनेछ ।