पछिल्लो २४ घण्टामा गण्डकीका २६ जनामा कोरोना पुष्टि भएको छ।

प्रदेश स्वास्थ्य निर्देशनालयको कोरोना सम्बन्धी विज्ञप्ति अनुसार पछिल्लो २४ घण्टामा गण्डकीका २३० जनामा गरिएको नमुना परीक्षणमा उक्त संख्याका मानिसको रिपोर्ट कोरोना पोजेटिभ आएको हो ।

संक्रमण पुष्टि हुनेमा गण्डकीका सात जिल्लाका छन् । जसअन्तर्गत कास्कीका १० जना, तनहुँका एक जना, गोरखाका तीन जना, लमजुङका दुई जना, नवलपुरका चार जना स्याङ्गजाका एक जना र बागलुङ जिल्लाका पाँच जनामा छन्। संक्रमण पुष्टि भएकासँगै गण्डकीमा कोरोना संक्रमितको कूल संख्या ८७ हजार ६७१ पुगेको छ ।

पछिल्लो २४ घण्टामा गण्डकीबाट ५७ जना कोरोनामुक्त भएका छन् । योसँगै, प्रदेशमा कोरोनामुक्त हुनेको संख्या ८५ हजार ९४१ पुगेको छ। अहिले प्रदेशभर ३२७ सक्रिय संक्रमित छन् ।

सोमबार गण्डकीमा थप एक जनाको मृत्यु पुष्टि भएको छ। मृत्यु पुष्टि हुनेमा स्याङ्गजा जिल्ला पुतली बजार नगरपालिका -८ निवासी ६९ वर्षीय पुरुष छन्।

थप मृतकसँगै गण्डकीमा कोरोना संक्रमणका कारण ज्यान गुमाउनेको संख्या १४०३ पुगेको निर्देशनालयले जनाएको छ।