पोखरा । यमपञ्चक अर्थात् तिहारको आज दोस्रो दिन ।

यस वर्ष यमदीपदान हिजोदेखि सुरु भए पनि काग र कुकुर तिहार भने आज एकै दिन परेको छ ।

नेपाल पञ्चाङ्ग निर्णायक समितिका अध्यक्ष प्रा. डा. रामचन्द्र गौतमका अनुसार तिथिको घटबढका कारण यो वर्ष यस्तो भएको हो ।

यमराजको दूतको रुपमा मानिएको कागको पूजा गरेर आज काग तिहार मनाइएको छ । कात्तिक कृष्ण त्रयोदशीमा सूर्योदय भएका दिन कागपूजा गरिन्छ ।

आज बिहान सवा ७ बजेसम्म त्रयोदशी तिथि परेकाले यस समयभित्र काग तिहार मनाइएको छ । कागलाई सन्देश वाहकको रुपमा हेरिने भएकाले शुभ सन्देशको अपेक्षा गर्दै कागको पूजा गरिन्छ ।

आजै इमान्दारीपूर्वक घरको सुरक्षामा खटिने कुकुरको पूजा गरी मीठो खानेकुरा खान दिएर मनाइँदै छ । आज बिहान सवा ७ बजेपछि चतुर्दशी तिथि लाग्ने भएकाले कुकुरको पूजा पनि आज नै गर्नु पर्ने समितिले जनाएको छ ।

घरमा कुकुर पाल्नाले मुटु र मधुमेहजस्ता रोग नलाग्ने आधुनिक वैज्ञानिक मान्यता छ । काग र कुकुरलाई यमदूतका रूपमा मानिन्छ ।