गण्डकीमा पछिल्ल्ला दिनमा नमुना परीक्षणको दर घटेसँगै दिनहुँ संक्रमण पुष्टि हुनेको संख्यामा पनि कमी आएको छ। विशेष गरी कास्कीको पोखरामा कोरोना संक्रमणको फैलावट अपेक्षित रुपमा घटिनसकेको भएपनि नमुना संकलन उल्लेख्य रुपमा हुन सकेको छैन। जसका कारण दिनहुँ संक्रमण पुष्टि हुनेको संख्यामा कमी आएको देखिएको छ।

प्रदेश स्वास्थ्य निर्देशनालयको कोरोना सम्बन्धी विज्ञप्ति अनुसार पछिल्लो २४ घण्टामा गण्डकीका १३२ जनामा गरिएको नमुना परीक्षणमा २३ जनामा संक्रमण पुष्टि भएको छ।

संक्रमण पुष्टि हुनेमा गण्डकीका सात जिल्लाका छन् । जसअन्तर्गत कास्कीका नौ जना, तनहुँका दुई जना, गोरखाका एक जना, लमजुङका एक जना र नवलपुरका पनि एक जना छन्।

यस्तै, स्याङ्गजाका आठ जना र म्याग्दी जिल्लाका एक जनामामा कोरोना संक्रमण पुष्टि भएको छ। संक्रमण पुष्टि भएकासँगै गण्डकीमा कोरोना संक्रमितको कूल संख्या ८७ हजार ३४९ पुगेको छ ।

पछिल्लो २४ घण्टामा गण्डकीबाट ३४ जना कोरोनामुक्त भएका छन् । योसँगै, प्रदेशमा कोरोनामुक्त हुनेको संख्या ८५ हजार ४२८ पुगेको छ। अहिले प्रदेशभर ५२५ सक्रिय संक्रमित छन् ।

सोमबार गण्डकीमा थप एक जनाको कोरोना संक्रमणका कारण मृत्यु पुष्टि भएको छ। मृतक कास्की जिल्ला पोखरा महानगरपालिका -२६ निवासी ५६ वर्षीय पुरुष छन्।

योसँगै, गण्डकीमा कोरोना संक्रमणका कारण ज्यान गुमाउनेको संख्या १३९६ पुगेको निर्देशनालयले जनाएको छ।