पोखरा । गण्डकी प्रदेशका कानुन, सञ्चार तथा प्रदेश सभा मामिला मन्त्री विन्दु कुमार थापाले स्वतन्त्र पत्रकारितालाई बाधा पुग्ने गरी प्रदेश कानुन नबन्ने विश्वास दिलाएका छन् । उनले आमसञ्चार विधेयक पत्रकारकै पक्षमा आउने बताउँदै पेलेर जाने पक्षमा आफू नरहेको प्रष्ट पारेका छन् ।

आदिवासी जनजाति पत्रकार महासंघ, गण्डकी प्रदेश समितिले स्याङ्जाको पर्यटकीय गाउँ सिरुबारीमा आयोजना गरेको ग्रामिण पर्यटन प्रवर्द्धन एवं पत्रकारको क्षमता अभिवृद्धि तालिमको शुभारम्भर गर्दै मन्त्री थापाले पत्रकारहरु आत्तिनु नपर्ने बताएका हुन् ।

मन्त्रालयकै सहयोगमा आयोजित कार्यक्रममा मन्त्री थापाले भने – म सञ्चार विधेयकका बारेमा पत्रकार साथीहरुसँग निरन्तर छलफल, विचार विमर्श गरिरहेका छौँ । लुम्बिनी लगायतका प्रदेशमा पेलेरै जाने रणनीतिका साथ सरकार अघि बढेको पनि थाहा पाएका छौँ । तर, तपाईंहरु ढुक्क हुनुहोस्, गण्डकी सरकार पत्रकारलाई पेलेर अघि बढ्दैन । विधायन समितिमा पुगेको सञ्चार विधेयक कसरी पत्रकारमैत्री बन्छ भनेर समिति सभापतिसँग पनि मेरो कुरा भइरहेको छ ।’

उनले अब सदन चल्नासाथ विधेयक पास गर्ने तयारी भइरहेको समेत बताए । फोनिजले पत्रकारहरुको क्षमता अभिवृद्धिका साथै ग्रामिण पर्यटन प्रवर्द्धनका लागि गरेको यो कार्यक्रम पवित्र उद्धेश्यको रहेकाले पनि साथ दिएको बताए । उनले नवप्रवेशी पत्रकारहरुलाई यस क्षेत्रमा लागिरहन प्रेरित गर्ने खालको कार्यक्रम गर्न पनि सुझाए ।

यसैबीच, मन्त्री थापाले कोरोना महामारीका कारण ठप्प रहेको पर्यटन क्षेत्रलाई अब चलायमान बनाउन पनि गाउँ गाउँमा ग्रामिण पर्यटन प्रवर्द्धन कार्यक्रम गर्नुपर्ने बताए । फोनिजको यो कार्यक्रमले पर्यटकलाई वृद्धि गर्न सघाउ पुग्ने मन्त्री थापाको भनाई छ ।

‘प्रदेश सरकारले गाउँ गाउँमा घरबास योजना (होम स्टे) का लागि कार्यविधि बनाएको छ । शहरबजारको कोलाहलबाट निस्कँदै ग्रामिण क्षेत्रमा आन्तरिक तथा बाह्य पर्यटक पुग्ने गरेको छ । अब शहरलाई एक छिन भएपनि बिर्साउने गरी होम स्टेमा अर्गानिक खाना खुवाउनुपर्छ । गाउँमै उत्पादित तरकारी, माछामासु, खाना भएमा मात्र पर्यटक खुशी हुन्छन्, र बसाईं लम्बाउन सकिन्छ ।’ मन्त्री थापाले भने ।

फोनिज गण्डकीका इन्चार्ज हुमबहादुर गुरुङले आफ्नोपन, पहिचान, सभ्यताले सिरुबारीलाई चिनाएको हुँदा अरु होमस्टेले पनि सिकेर उन्नति गरेको बताए । उनले पर्यटन र पत्रकार पर्यायवाची शब्द भएका कारण सँगसँगै हातेमालो गरेर अघि बढ्नुपर्ने धारणा राखे ।

कानुन, सञ्चार तथा प्रदेशसभा मामिला मन्त्रालयका उपसचिव हिमालचन्द्र अर्यालले आन्तरिक पर्यटक बढाउने खालका कार्यक्रम फोनिजसँग मिलेर गर्न पाउँदा खुसी लागेको बताए । आगामी दिनमा पनि यस्ता अन्य कार्यक्रमहरुमा सहकार्य गर्ने उनको भनाइ थियो ।

वडाध्यक्ष लोकप्रसाद ढकालले होमस्टेका लागि सकेको सहयोग गरिरहेको जनाए । अझै पनि भनेजस्तो नभएका कारण राम्रो गर्ने प्रयास जारी रहेको अध्यक्ष ढकालले बताए ।

कार्यक्रममा पत्रकार महासंघ कास्कीका अध्यक्ष श्रीकृष्ण सिग्देलले पछिल्लो समय पत्रकारहरुको क्षमता अभिवृद्धिसँगै आधारभूत तालिमको पनि आवश्यकता रहेको बताए । यसमा पत्रकारसँग सम्बन्धित सबैले ध्यान दिनुपर्ने उनले जनाए ।

अन्तर्क्रियाको पहिलो सत्रमा ‘पत्रकार पेसागत क्षमता अभिवृद्धि’ विषयमा फोनिज गण्डकीका इन्चार्ज पत्रकार हुम गुरुङले कार्यपत्र प्रस्तुत गरेका थिए ।

दोस्रो सत्रमा कानुन, सञ्चार तथा प्रदेशसभा मामिला मन्त्रालयका निमित्त सचिव काशीराम गैह्रेले गत वर्ष भएका कार्यक्रम र यो वर्षका योजना र कार्यक्रमबारे आफ्नो प्रस्तुतिमार्फत् पत्रकारलाई प्रष्ट पारे । तेस्राे तथा अन्तिम सत्रमा ‘ग्रामीण पर्यटनको पाठशाला’ विषयमा पर्यटनविद् हरिसिंह गुरुङको कार्यपत्रमाथि अन्तर्क्रिया गरिएको थियो ।

कानुन, सञ्चार तथा प्रदेशसभा मामिला मन्त्रालयको आर्थिक सहयोगमा भएको कार्यक्रममा फोनिज गण्डकी अध्यक्ष एमबी आस्थाले पर्यटन प्रवद्र्धनमा पत्रकारले सधैं साथ दिने बताए । महासचिव रुद्र श्रीषमगरले फोनिजले पर्यटन प्रवद्र्धनमा फोनिजले अझै उत्कृष्ट कार्यक्रम ल्याउने जनाए । फोनिज गण्डकीका उपाध्यक्ष दिल श्रीषमगरले आदिवासी जनजाति पत्रकार उत्पादनमा जोड दिए । नयाँ पत्रकार जन्माउन र भएका पत्रकार जोगाउनु पछिल्लो समय चुनौतीको विषय रहेको उनको भनाइ थियो ।

पत्रकार क्षमता अभिवृद्धि तालिममा गण्डकीका विभिन्न जिल्लामा कार्यरत तीन दर्जन बढी पत्रकारहरु सहभागी थिए ।