पछिल्लो २४ घण्टामा गण्डकीका ५७ जनामा कोरोना पुष्टि भएको छ।

प्रदेश स्वास्थ्य निर्देशनालयको कोरोना सम्बन्धी विज्ञप्ति अनुसार पछिल्लो २४ घण्टामा गण्डकीका ४४५ जनामा गरिएको नमुना परीक्षणमा उक्त संख्याका मानिसको रिपोर्ट कोरोना पोजेटिभ आएको हो ।

संक्रमण पुष्टि हुनेमा गण्डकीका सात जिल्लाका छन् । जसअन्तर्गत कास्कीका ३६ जना, तनहुँका आठ जना, लमजुङका एक जना र नवलपुरका पाँच जना छन्। यस्तै, स्याङ्गजाका पाँच जना, पर्वतका एक जना र म्याग्दी जिल्लाका एक जनामामा कोरोना पुष्टि भएको छ। संक्रमण पुष्टि भएकासँगै गण्डकीमा कोरोना संक्रमितको कूल संख्या ८७ हजार ३२६ पुगेको छ ।

पछिल्लो २४ घण्टामा गण्डकीबाट ३९ जना कोरोनामुक्त भएका छन् । योसँगै, प्रदेशमा कोरोनामुक्त हुनेको संख्या ८५ हजार ३९४ पुगेको छ। अहिले प्रदेशभर ५३७ सक्रिय संक्रमित छन् ।

आइतबार गण्डकीमा थप एक जनाको कोरोना संक्रमणका कारण मृत्यु पुष्टि भएको छ।  मृतक कास्की जिल्ला पोखरा महानगरपालिका -१७ निवासी ७८ वर्षीया वृद्धा छिन्।

योसँगै, गण्डकीमा कोरोना संक्रमणका कारण ज्यान गुमाउनेको संख्या १३९५ पुगेको निर्देशनालयले जनाएको छ।