पछिल्लो २४ घण्टामा गण्डकीका ८७ जनामा कोरोना पुष्टि भएको छ।

प्रदेश स्वास्थ्य निर्देशनालयको कोरोना सम्बन्धी विज्ञप्ति अनुसार पछिल्लो २४ घण्टामा गण्डकीका ६११ जनामा गरिएको नमुना परीक्षणमा उक्त संख्याका मानिसको रिपोर्ट कोरोना पोजेटिभ आएको हो ।

संक्रमण पुष्टि हुनेमा गण्डकीका नौ जिल्लाका छन् । जसअन्तर्गत कास्कीका ३७ जना, तनहुँका तीन जना, गोरखाका दुई जना, लमजुङका १४ जना र नवलपुरका आठ जना छन्।

यस्तै, स्याङ्गजाका १२ जना, पर्वतका तीन जना, बाग्लुङका एक जना र म्याग्दी जिल्लाका सात जनामा कोरोना पुष्टि भएको छ। संक्रमण पुष्टि भएकासँगै गण्डकीमा कोरोना संक्रमितको कूल संख्या ८७ हजार ९४ पुगेको छ ।

पछिल्लो २४ घण्टामा गण्डकीबाट ७० जना कोरोनामुक्त भएका छन् । योसँगै, प्रदेशमा कोरोनामुक्त हुनेको संख्या ८५ हजार २७५ पुगेको छ। अहिले प्रदेशभर ४२६ सक्रिय संक्रमित छन् ।

मंगलबार गण्डकीमा थप तीन जनाको मृत्यु पुष्टि भएको छ। मृत्यु हुनेमा तनहुँ जिल्ला शुक्लागण्डकी नगरपालिका -१० कि १७ वर्षीया युवती, तनहुँ ब्यास नगरपालिका -४ का ६७ वर्षीय वृद्ध र कास्की पोखरा महानगरपालिका -६ का  ४३ वर्षीय पुरुष छन्। योसँगै, गण्डकीमा कोरोना संक्रमणका कारण ज्यान गुमाउनेको संख्या १३९३ पुगेको निर्देशनालयले जनाएको छ।