पूर्वयुवराज पारस शाहको पोखरास्थित फ्ल्याटमा चोरी भएको छ । लेकसाइड, बुलौंदी स्थित शाह बस्दै आएको फ्ल्याटबाट सामान चोरी भएको थियो ।

उनकै फ्ल्याटमा बस्ने कामदारले नै चोरी गरेको खुल्न आएको कास्की प्रहरी प्रवक्ता डिएसपी सुवास हमालले जानकारी दिए । काठमाडौंको मित्रनगरबाट शिव गौतमलाई पक्राउ गरिएको महानगरीय प्रहरी परिसरले जनाएको छ ।

काठमाडौं महानगरपालिका–२६ मित्रनगर स्थित न्यू राप्ती गेस्टहाउसबाट महानगरीय प्रहरी परिसर काठमाडौंबाट खटिएको टोलीले उनलाई पक्रेर अनुसन्धान गरिरहेको छ ।

कास्की प्रहरी प्रमुख एसपी रमेश थापाले भने शाहले कास्कीमा निवेदन नदिएको बताए । प्रवक्ता हमालले पनि आफूहरुलाई अफिसियल रिपोर्टिङ नगरेपनि काठमाण्डौबाट पक्राउ गरेको जानकारी पाएको बताए ।

शाहको निवासबाट क्यामरा, आइप्याड २ थान, दुरविन २ थान र नोकिया सेट चोरी भएको बताइएको छ । गौतमले पोखराबाट सामान चोरेर काठमाडौं पुर्याएको खुलेको छ ।

चोरेको सामान गौतमले पूर्वयुवराजलाई फिर्ता गरेको महानगरीय प्रहरी परिसरले जनाएको छ । आरोपीलाई महानगरीय प्रहरी वृत महाराजगञ्जमा राखिएको प्रहरीले जनाएको छ ।