पोखरा । चौंथो संस्करणको एभरेष्ट प्रिमियर लिग (ईपीएल) टी–ट्वान्टी क्रिकेटमा आज मंगलबार एक खेल हुँदैछ ।

त्रिवि क्रिकेट मैदानमा हुने एक मात्र खेलमा काठमाडौँ किङ्स–११ र पोखरा राइनोजबीच खेल हुने कार्यतालिका रहेको छ। खेल मध्यान्न १२ः१५ बजे सुरु हुनेछ ।

सन्दीप लामिछानेको कप्तानीमा रहेको काठमाडौँ दोस्रो जित निकाल्ने योजनामा रहेको छ। काठमाडौँले पहिलो खेलमा साविक विजेता ललितपुर प्याट्रीयट्सलाई हराएको थियो।

विनोद भण्डारीको कप्तानीमा रहेको पोखरा पहिलो जितको खोजीमा रहेको छ । पहिलो खेलमा पोखराले भैरहवा ग्लाडीयटर्ससँग अंक बाडेको थियो । सोमबार भारी वर्षाको कारण खेल रद्द भएपछि पोखरा र भैरहवाले एक एक अंक बाँडेको थियो ।

प्रतियोगितामा ६ शहरका फ्रेन्चाइज टिमले प्रतिस्पर्धा गरिरहेका छन् ।

प्रतियोगिताको विजेताले ५० लाख प्राप्त गर्नेछ । यस्तै उपविजेताले १५ लाख पाउने जनाइएको छ ।