काठमाडौंमा दशैंका लागि कपडा अर्डर गरेर पोखरा फर्कँदै गर्दा बिहिबार राति पोखरेली व्यवसायी प्रेमबहादुर भुजेलसहित ४ जना कार दुर्घटनामा परे ।

मध्येरात १२ बजेतिर नाग्दीखोला भन्ने ठाउँको घुम्तीबाट त्रिशूली नदीमा खस्दा भुजेल र दुई जना अझै वेपत्ता छन् । कार दुर्घटनामा प्रेमसहित पोखरा १७ का लेखबहादुर भुजेल र ईश्वरी भुजेल पनि त्रिशूलीमा हराएका हुन् ।

कारमा सवार रुद्र सुवेदी ढोकाबाट उछिट्टिएर बाँच्न सफल भए । उनलाई भरतपुरमा उपचारपछि पोखरा ल्याइएको छ । कारको टुक्राहरु बाहेक अरु केही फेला पार्न सकिएको छैन । शुक्रबार दिनभर खोजी गर्दा पनि प्रेमसहित ३ जना नभेटिएको जिल्ला प्रहरी कार्यालय चितवनले जानकारी दिएको छ ।

ड्रोन उडाएर त्रिशूलीको किनारैकिनार खोजी गरिएको छ भने सशस्त्रका गोताखोरले पनि खोजेको थियो । खोजी कार्यलाई शनिबार पनि जारी राखिएको छ । नाग्दीखोला क्षेत्र अत्यधिक दुर्घटना भइरहने ठाउँ भएको प्रहरीको भनाई छ ।

प्रेम पोखरा चेम्बर अफ कमर्सका वरिष्ठ उपाध्यक्ष हुन् । उनी असोज २ गते तेस्रो साधारणसभा तथा पहिलो अधिवेशनबाट वरिष्ठ उपाध्यक्ष चुनिएका थिए । नेकपा (एमाले) को जनवर्गीय संगठन नेपाल उद्योग तथा व्यवसायी महासंघ कास्कीको सदस्य पनि हुन् । कपडा व्यवसायी संघ कास्कीका पूर्वअध्यक्ष रहेका उनी पोखरा उद्योग वाणिज्य संघका पूर्वसदस्य पनि हुन् ।

हंसपुरका उनी प्रकृति सप्लायर्सका सञ्चालक हुन् । कपडा व्यवसायी भुजेल दसैंका लागि कपडा किनमेल गर्न काठमाडौं गएका थिए ।

घाइते अवस्थामा फेला परेका रुद्र सुवेदीले आफूलाई दुर्घटना कसरी भयो भन्नेबारे थाहा नभएको प्रहरीसँगको सोधपुछमा बताएका छन् । एक्कासी ड्याम्म आवाज आएको र आफू रुखमा अड्किएको उनले सुनाएका छन् ।

त्रिशुलीमा कार दुर्घटनाः पोखरा चेम्बरका बरिष्ठ उपाध्यक्ष भुजेलसहित ३ बेपत्ता, १ घाइते