काठमाडौँ । नेपाल सरकारले सेनेटरी प्याडमा कर लगाउने निर्णय गरेको भन्दै नेकपा (एमाले) निकट अनेरास्ववियुले विरोध जनाएको छ।

विश्वको करिब चार अर्व र नेपालका करिब एक करोड पचास लाख महिलाले प्रयोग गर्ने सेनेटरी प्याडमा वर्तमान सरकारले लगाएको १० प्रतिशत भन्सार शुल्क र १३ प्रतिशत भ्याट प्रति गम्भीर ध्यानाकर्षण भएको अनेरास्ववियुले जनाएको छ।

शुक्रबार प्रेस वक्तव्य जारी गर्दै अनेरास्ववियुले महिलाको संवेदनशीलताप्रति बेवास्ता र विभेद भएको भन्दै आपत्ति प्रकट गरेको छ ।

‘सरकारले लगाएको १० प्रतिशत भन्सार शुल्क र १३ प्रतिशत भ्याटप्रति अनेरास्ववियुको गम्भीर ध्यानाकर्षण भएको छ,’ अध्यक्ष सुनिता बरालले जारी गरेको वक्तव्यमा उल्लेख छ ।

अनेरास्ववियुले केपी ओली नेतृत्वको सरकारले आर्थिक वर्ष ०७६÷०७७ देखि नै सामुदायिक विद्यालयमा अध्ययनरत छात्राहरुको लागि निशुल्क रुपमा उपलब्ध गराउँदै आएको स्मरण गर्दै सो कार्यक्रमलाई थप व्यवस्थित र प्रभावकारी बनाउँदै विश्वविद्यालयमा अध्ययनरत छात्राहरुका लागि समेत निशुल्क र अनिवार्य सेनेटर प्याड उपलब्ध हुने व्यवस्था गर्न सरकारसँग माग गरेको छ।