पोखरा २७ तालचोकमा रहेको पिजी रियल स्टेट एण्ड जब लिंक नामक ठग कम्पनीबाट पीडित बनेकाहरु आफ्नो पैसा फिर्ता लिन जिल्ला प्रहरी कार्यालयमा लाइन लाग्न थालेका छन् ।

स्याङ्जा फेदीखोला–४ घर भएका २१ वर्षीय कृष्णप्रसाद पौडेलले सयौंलाई जागिर कन्फर्म भन्दै २५ सय लिएर ठगेका थिए । पौडेल अहिले कास्की प्रहरी हिरासतमा छन् । शुक्रबार नै शिशुवा प्रहरीले पक्राउ गरेको थियो ।

• सम्बन्धित समाचारः कृष्णको कर्तुत: स्टार होटलमा मासुभात खुवाएर सयौँलाई खुलेआम ठगे [भिडियो]

जिप्रका कास्कीका प्रवक्ता डिएसपी सुवास हमालका अनुसार पौडेललाई ठगी (आपराधिक लाभ, विश्वासघात) मुद्दामा कास्की जिल्ला अदालतबाट सात दिन म्याद थप गरी अनुसन्धान प्रकृया अगाडि बढाइएको छ । डिएसपी हमालले कृष्ण पौडेलबाट ठगिनेहरुले सप्रमाण कास्की प्रहरीमा उपस्थित भई जाहेरी दर्ता गर्न आग्रह गरेपछि प्रहरी गेटमा धर्ना दिएर बस्ने पीडितहरु अहिले लाइन बसेर पैसा पाउँ भनी निवेदन दिएको देखिन्छ ।

पीडित युवाहरूको दाबीलाई आधार मान्ने हो भने उनले ४५ सय बढीबाट जनही २५ सयको दरले मात्र पनि एक करोड १२ लाख भन्दा बढी ठगी गरेको देखिन्छ । पीडित युवाहरूकै अनुसार कतिपयलाई त उनले भिन्न भिन्न पदका लागि दुई÷तीन पटकसम्म पनि फारम भर्न लगाएर पैसा असुलेका छन् ।

धर्नामा २ सय बढी युवाहरु थिए तर अहिलेसम्म निवेदन दिनेको संख्या १०० पुगेको छ । मंगलबारसम्म प्रहरीकोमा ८३ जनाले आफू ठगिएको प्रमाण पेस गरेका छन् । बुधबारपनि यो क्रम जारी रहेको छ ।

प्रहरीले १०–१० जनाको टीममा बोलाएर प्रमाण संकलन गरी कागज बनाएर पीडितहरुलाई घर पठाएका छन् । १० जनाको कागजी प्रक्रिया पूरा गर्न नै एक घण्टासम्म लागेको भेटिएको छ । यसले गर्दा लाइन बस्नेहरु झण्झट मान्ने गरेका छन् । उनीहरुले प्रहरीलाई चाँडो गरिदिन पनि आग्रह गरेका छन् ।

डिएसपी हमालले ३ हप्ताभित्रमा जिप्रकामा आई निवेदन दिन आग्रह गरेका छन् । प्रमाण स्वरूप पौडेलले पैसा लिएको रसिद र कागजात प्रहरीसमक्ष पेस गर्न भनिएको छ । डिएसपी हमालले भने, ‘ यदि कोही आफू ठगिएको हुनुहुन्छ भने अबको तीन सातासम्म आएर हामीलाई सम्पर्क गरेर आफूसँग भएका प्रमाण पेस गर्न सक्नुहुन्छ ।’

डिएसपी हमालका अनुसार ठगिएकामध्ये ३ जनाको मात्र आइतबार जाहेरी लिइएको हो। कारबाही अघि बढाउन यही पर्याप्त रहेको उनको भनाई छ । ‘हामीले सबैलाई जाहेरी दिन पर्दैन भनेका छौँ, जाहेरी दिँदा खर्च हुन्छ बरु तपाईंहरूले ठगिएको प्रमाण स्वरूप बिल भौचर लगायतका कागजात पेस गर्नु भनेका छौँ ।’ उनले भने ।

हालसम्म भएको अनुसन्धानले पौडेलले सञ्चालन गरेको कम्पनी कानुनसम्मत रहेको पाइएको डिएसपी हमालको दाबी छ । हमालले भने, ‘हामीले अनुसन्धानका क्रममा लिएका कम्पनीका कागजात ओरिजिनल छन् । काम कानुनसम्मत नै गरेको हो । उनीहरूलाई जागिर मात्र लगाउन नसकेको हो ।’

उसले पीडितहरूलाई जागिर लगाइदिन्छु भनेर उल्लेख गरेका विभिन्न कम्पनीको बारेमा सम्बन्धित कम्पनीलाई पत्राचार गरिएको डिएसपी हमालको भनाइ छ । ती कम्पनी सञ्चालनमा रहे नरहेको र रहेको भए पौडेलले त्यस्ता कम्पनीसँग जागिर बारे सम्झौता गरे नगरेको भन्ने बारे सम्बन्धित कम्पनीले पत्राचारको जवाफ दिएपछि मात्र थाहा हुने डिएसपी हमालले उल्लेख गरेका छन् ।

पत्रकार अधिकारीमाथि भएको हातपात र घिमिरेमाथि दुर्व्यवहारको महासंघद्वारा भर्त्सना

कृष्णको कालो कर्तुतको कहानीः स्टार होटलमा मासुभात खुवाएर सयौँलाई खुलेआम ठगे [भिडियो]