नेपाल र भारतबीच भएको दोस्रो मैत्रीपूर्ण फुटबल खेलमा भारत २-१ ले विजयी भएको छ।  आइतबार दशरथ रंगशालामा भएको मैत्रीपूर्ण खेलमा भारत २-१ ले  विजयी भएको हो।

पहिलो हाफ गोलरहित रहेपनि दोस्रो हाफमा भारतका लागि फारुख चौधरीले ६३ औं र कप्तान सुनिल क्षेत्रीले ८० औं मिनेटमा गोल गरेका हुन्।

२-० ले पछि परेको अवस्थामा नेपालका लागि ८७ औं मिनेटमा तेज तामाङले गोल फर्काएका हुन् ।

पहिलो हाफमा केही लयमा देखिएको नेपाल दोस्रो हाफको शुरुवातीमा त्यति जम्न सकेन । भारत विरुद्ध नेपालले गोल गर्ने थुप्रै सुन्दर मौका पाएपनि त्यसलाई सदुपयोग गर्न सकेन। जसका कारण नेपालले घरेलु मैदानमा भारतलाई २-१ को नतिजा सुम्पिनु पर्यो।

यसअघि गएको बिहीवार भएको पहिलो मैत्रीपूर्ण खेल १–१ को बराबरीमा सकिएको थियो ।

असोज १५ देखि ३० गतेसम्म माल्दिभ्समा हुने साफ च्याम्पियनसिपको तयारीको लागि नेपाल र भारतले मैत्रीपूर्ण खेल खेलेका हुन् ।

आजको खेलमा नेपालका कप्तान तथा गोलकिपर किरण चेम्जोङले राष्ट्रिय टोलीका तर्फबाट ७४ औं खेल खेलेर नयाँ कीर्तिमान बनाएका छन् ।