मनकामना केबलकार भदौ दोस्रो सातादेखि सञ्चालन गर्ने तयारी भइरहेको छ ।

आगामी भदौ १५ गतेदेखि केबलकार सञ्चालनका लागि सरोकारवालासँग आवश्यक छलफल समेत भइसकेको प्रालिका नायव प्रबन्धक उज्वल सेरचनले बताए । ‘साउन ३० गते वडा कार्यालयमा जनप्रतिनिधिसहित सरोकारवालाहरुसँग बैठक बसेका थियौ,’ उनले भने, ‘मन्दिर नखुलेपनि केबलकार सञ्चालन गर्ने कुरामा सबै सहमत हुनुभयो ।’

प्रशासनसँग आवश्यक समन्वयका लागि मनकामना मन्दिर क्षेत्र विकास समितिलाई जिम्मा दिइएको उनले जानकारी दिए ।

सरकारले लकडाउन नगरेमा भदौ १५ बाट केबलकार सेवा सञ्चालन गर्ने गरी तयारी भइरहेको उनले बताए ।

‘असार महिनादेखि चन्द्रागिरि केवलकार सञ्चालनमा आइसक्यो, सार्वजनिक यातायात लगायतका अन्य क्षेत्रहरु पनि खुलिसके, ११ गतेपछि गोरखाको निषेधाज्ञा पनि केही खुकुलो होला, सबै क्षेत्र खुलिसक्यो केबलकार मात्र के बन्द गर्ने भनेर सञ्चालन गर्न लागेका हौ,’ उनले भने ।