काठमाडौँ । नेपाली कांग्रेसको रामचन्द्र पौडेल पक्षका जिल्ला सभापतिहरुले क्रियाशील सदस्यता सार्वजनिक गर्न माग गर्दै पार्टी मुख्यालयमा धर्ना बस्ने भएका छन् ।

हिजो साँझ सभापति शेरबहादुर देउवालाई बुझाइएको क्रियाशील सदस्यहरुको नामावली तत्काल सार्वजनिक गर्न माग गर्दै उनीहरु आज पार्टी मूख्यालय सानेपामा धर्ना बस्न लागेका हुन् ।

सभापति देउवा, वरिष्ठ नेता रामचन्द्र पौडेल र पूर्वमहामन्त्री कृष्णप्रसाद सिटौलाबीच सहमति गरेर सोमबार साँझ क्रियाशील सदस्यता विवाद टुंगो लागेको घोषणा गरिएको थियो । सिटौलाले देउवा र पौडेललाई क्रियाशील सदस्यहरुको प्रतिवेदन बुझाएका थिए ।

तर जिल्लाहरुले सिफारिस गरेको भन्दा फरक नामावली र संख्या स्वीकृत गरिएको आशंका उनीहरुले गरेका छन् । आज बिहान ११ बजेदेखि १ घण्टा सांकेतिक रुपमा धर्ना दिने र त्यति गर्दा पनि नसुने थप सशक्त रुपमा उत्रिने तयारी जिल्ला सभापतिहरुको छ ।

यसअघि पनि क्रियाशील सदस्यता विवादका कारण नेता, कार्यकर्ताहरु धर्नामा बस्दै आएका थिए ।