झापा । झापामा झुण्डिएको अवस्थामा ८ महिने शिशुसहित दम्पती मृत फेला परेका छन् ।

जिल्लाको कनकाई नगरपालिका १ दुर्गापुरका ३४ वर्षीय रविन विक, उनकी पत्नी २९ वर्षीया मीना बस्नेत विक र ८ महिनाकी छोरी रुविना झुण्डिएको अवस्थामा फेला परेको इलाका प्रहरी कार्यालय सुरुंगाले जनाएको छ ।

उनीहरू घरको कोठा भित्र पासो लागेर झुन्डिएको अवस्थामा फेला पारेको प्रहरीले जानकारी दिएको छ। आमा छोरी एउटा पासोमा र बाबु अर्को पासोमा झुन्डिएको अवस्थामा प्रहरीले फेला पारेको थियो।

घटनाको प्रकृति हेर्दा आत्महत्या जस्तो देखिएको प्रहरीले जनाएको छ ।

मृतक रविन केही दिनअघि विदेश जान भनेर काठमाडौँ गएका थिए। तर साउन ३१ गते कोरोना परीक्षण गर्दा पोजेटिभ देखिएपछि उनी झापा फर्किएर होम क्वारेन्टीनमा बसेको खुलेको छ।

आत्महत्या गर्नुपर्ने कारण भने खुल्न सकेको छैन । घटनाबारे थप अनुसन्धान भइरहेको प्रहरीले जनाएको छ ।