पोखराको सृजनाचोकमा बनेको पहिलो आकाशे पुल लगायत ताल वरपरका क्षेत्रमा सर्वसाधारणको भीड बढ्न थालेको भन्दै सरोकारवाला निकायले भीडभाड नगर्न सचेत गराएको छ ।

सिर्जनाचोकको आकाशे पुलमा निर्माण सम्पन्न पश्चात् नै टिकटक बनाउने र तस्वीर खिच्नेहरुको भीड लाग्न थालेको छ । पुलसहित फेवा पावर हाउस छेउमा रहेको झरना, बेगनास र फेवा ताल वरपर सर्वसाधारणको जमघट बाक्लिँदा कोरोना संक्रमणको जोखिम बढेको निश्कर्ष निकालिएको छ ।

गण्डकी प्रदेश स्वास्थ्य निर्देशनालय पोखराका अनुसार यी क्षेत्रहरुमा सर्वसाधारणहरु जम्मा हुन थालेको भन्दै धेरै गुनासोहरु पुगेका छन् । कोरोना संक्रमणको जोखिम कम नभइसकेको अहिलेको अवस्थामा आवश्यक काम नपरिकन घरबाट बाहिर ननिस्कन निर्देशनालयले सर्वसाधारणलाई आग्रह गरेको छ ।

सर्वसाधरणहरुको गुनासो पश्चात सो कार्यालयले आवश्यक काम नपरी घरबाट ननिस्कन, अनावश्यक भिडभाड नगर्न र संक्रमण हुनसक्ने त्यस्ता ठाउँमा नजान सबैलाई सूचित गरेको जनाएको छ ।