काठमाडौँ । अफगानिस्तानको काबुलबाट थप ८७ जना नेपाली काठमाडौँ आइपुगेका छन् ।

काबुलबाट उद्धार गरेर कुवेत पु-याइएका उनीहरु त्यहाँबाट जजिरा एअरमाफर्त गएराति ११ बजे काठमाडौँ आइपुगेको जनाइएको छ ।

हिजो बिहान पनि ११८ जना नेपाली काठमाडौँ आइपुगेका थिए । अमेरिकी सरकारको बन्दोबस्तीमा नेपालीहरु काठमाडौँ आइपुगेको त्रिभुवन अन्तर्राष्ट्रिय विमानस्थल कार्यालयले जनाएको छ ।

अमेरिकी दूतावासमा सुरक्षागार्डका रूपमा रहेका ३८५ मध्ये २०५ जना नेपाल आइपुगेका छन् भने उद्धार गरेर कतार पु-याइएका अन्यलाई पनि स्वदेश ल्याउने तयारी भइरहेको छ । स्वदेश ल्याइएकाहरुलाई प्रक्रिया पु-याएर घर पठाउने परराष्ट्र मन्त्रालयले जनाएको छ ।

अफगानिस्तानमा अझ धेरै नेपालीहरु उद्धारको पर्खाइमा छन् । मंगलबार साँझसम्म अफगानिस्तानमा रहेका २५६ जना नेपालीले कन्सुलर सेवा विभागको बेव पोर्टलमा घर फर्कनको लागि आफ्नो विवरण दर्ता गरेको मन्त्रालयले जनाएको छ ।