पोखरा। जबर्जस्ती करणी मुद्धाका प्रतिवादीलाई छुटाई दिने भन्दै पैसा ठगेर फरार रहेका एक जनालाई कास्की प्रहरीले पक्राउ गरेको छ।

२०७७ साल फागुन १९ गते जबर्जस्ती करणी मुद्धाका प्रतिवादीलाई ‘प्रहरी वकिल र अदालतसँग सेटिङ छ, १ करोड दिए मिलाइदिन्छु नत्र १५ वर्ष जेल जान्छ’ भन्दै झुठ्ठो आश्वासन देखाई विश्वासमा लिएर तीन जनाले उनिहरुबाट १२ लाखको चेक र १ लाख १० हजार नगद ठगी गरेका थिए।

ठगी गरेका मध्ये सूर्यलाल खड्का र कमन भन्ने कमान बहादुर तामाङलाई प्रहरीले पोखरा -१७ राष्ट्रबैंक चोक स्थित एक खाजा घरबाट पक्राउ गरी मुद्धा दायर गरेकोमा एक जना भने फरार रहँदै आएका थिए।

फरार रहँदै आएका पोखरा महानगरपालिका वडा नं -१८ सराङकोट बस्ने ४९ वर्षीय भोजराज त्रिपाठीलाई बुधबार पक्राउ गरेको जिल्ला प्रहरी कार्यालय कास्कीले जानकारी दिएको छ ।

पक्राउ परेका त्रिपाठीलाई बुधबार नै जिल्ला अदालत कास्कीमा बुझाइएको छ। त्रिपाठी विरुद्ध अदालतमा ठगी र जबरजस्ती करणी कसूरमा मिलापत्र गर्न गराउन नहुने अभियोगमा मुद्धा रहेको छ।