मोडल आकांक्षा विश्वकर्मा ‘मिस पेटिट ग्लोबल २०२२’ मा सहभागी हुँदैछिन् । ‘मिस ग्रेस पोखरा २०२१’ को उपाधि विजेता आकांक्षाले ‘मिस पेटिट ग्लोबल’ मा सहभागिता जनाउने अवसर पाएकी हुन् ।

पोखरामा रहेर मोडलिङ गर्दै आएकी आकांक्षाले मलेसियामा आगामी फेब्रुअरीमा हुने’मिस पेटिट ग्लोबल २०२२’ मा सहभागिता जनाउने पक्का भएर तयारी सुरु गरेको बताइन् । मिस ग्रेस पोखरा विजेताले सिधै मिस पेटिट ग्लोबलमा सहभागिता जनाउने अवसर पाउँछन् ।

टियरा मेनेजमेन्टको आयोजनामा ३५ देशका प्रतिष्पर्धीको सहभागिता रहने सो इभेन्टमा आफूले नेपाललाई चिनाउने राम्रो मौका मिलेको पनि बताइन् ।

सहभागिताको उपाधि जित्नको लागि फाइनल स्पीच, प्रश्नोत्तर, इभिनिङ गाउन, स्पोर्ट वेयर, राष्ट्रिय पोशाक, टप मोडल, फिटनेस च्यालेन्ज, ट्यालेन्ट राउण्ड र डिप इन्टरभयू मार्फत प्रतियोगीले क्षमता प्रस्तुत गर्नेछन् । यसको लागि आफूले अहिल्यैबाट तयारी थालेको उनले जनाइन् ।

आकांक्षाले हालै सम्पन्न नेपाल संगीत तथा नाट्य अवार्ड २०७७ कार्यक्रममा वेष्ट पेजेन्ट अवार्ड जितेकी थिइन् । पोखराको जनप्रिय क्याम्पसबाट प्लस टु उत्तीर्ण भएकी उनी अहिले स्नातक पहिलो वर्षमा अध्ययनरत छिन् ।

नेपालको संस्कृतिलाई विश्वमाझ चिनाउँदै उपाधि चुम्ने आफ्नो लक्ष्य रहेको उनको भनाई छ । ‘मेरो लक्ष्य नेपालको संस्कृतिलाई विश्वमाझ चिनाउदै उपाधि चुम्ने हो’ उनले भनिन् । भोलिको दिनमा मोडलिङबाट नै आफू अघि बढ्ने आकांक्षाले बताइन् ।