पोखरा । प्रतिपक्षी दल नेकपा एमालेको अवरोधपछि गण्डकी प्रदेशसभा बैठक स्थगित भयो । बजेट माथिको छलफलका लागि आज बसेको बैठकमा असारको दोश्रो साता सरकारले १४ करोड १९ लाख रुपैयाँ रकमान्तर गरेको विषयलाई मूख्य एजेण्डा बनाएको छ ।

एमालेले सरकारले गरेको रकमान्तरको फेहरिस्त मागेर सदन चल्न नदिउको हो । काँग्रेसले सरकारमा पुग्नासाथ समय नहुँदा पनि हतार हतार नातागोता र कार्यकर्ता पोस्नका लागि रकमान्तर गरिएको आरोप एमालेले लगाएको छ ।

सभामुख नेत्रनाथ अधिकारीले बैठक सुरु भएको जनाउ दिनासाथ एमाले सांसदहरु आफ्नो ठाउँबाट उठेका थिए । त्यसपछि सभामुखले एमाले सांसद रामशरण बस्नेतलाई बोल्न समय दिए ।

‘रकमान्तर के कारणले गर्नुप¥यो ?योजना कसरी छनोट भए ?,’ एमाले सांसद बस्नेतले भने, ‘यसको फेहरिस्त नआउँदासम्म यो सदन अघि बढ्न नसक्ने जानकारी गराउँछु ।’ पोखराको एउटै वडामा करोडौं रुपैयाँ विनियोजन गरिएकोमा उनले आपत्ति जनाए ।