एजेन्सी – इटाली यूरो कपको फाइनलमा प्रवेश गरेको छ । टाइब्रेकरमा स्पेनलाई ४-२ ले पराजित गर्दै इटालीले उपाधि भिडन्तमा स्थान पक्का गरेको छ । निर्धारित ९० मिनेटको खेल १-१ को बराबरीमा सकिएपछि खेल अतिरिक्त समयमा लम्बिएको थियो । अतिरिक्त समयमा पनि गोल हुन नसक्दा खेलको नतिजा टाइब्रेकरबाट लिइएको थियो ।

टाइब्रेकरमा इटालीका लागि पहिलो प्रहार गर्न आएका म्यानुएल लोकाटेलीको प्रहार गोलरक्षक उनाइ सिमोनले बचाएका थिए । लगत्तै ड्यानी ओल्मोले पनि स्पेनको पहिलो प्रहार पोस्टभन्दा निकै माथि प्रहार गरे । दोस्रो प्रहारमा इटालीका आन्द्रीए बेलोट्टी र स्पेनका जेरार्ड मोरेनो दुवैले गोल गरे ।

इटालीका लिओनार्डो बोनुचीले तेस्रो प्रहारमा गोल गर्दा स्पेनका थियागोले पनि कुनै गल्ती गरेनन् । फेडेरिको बर्नार्डेस्कीले इटालीको चौथो प्रहारमा गोल गर्दा स्पेनका तर्फबाट भने अल्भारो मोराटाले गोल गर्न सकेनन् । मोराटाको प्रहार डोनारुम्माले सहजै बचाए । इटालीका लागि पाँचौ पेनाल्टीमा जर्जिन्होले गोल गर्दै फाइनलमा स्थान पक्का गरे ।

६० औं मिनेटमा फेडेरिको किएजाको गोलमा इटालीले अग्रता लिएको थियो । इटालीले एकातर्फ गोलको अवसर सदुपयोग गर्न नसक्दा लगत्तै अर्को तर्फ स्पेनले बराबरी गोल फर्कायो । वैकल्पिक खेलाडीका रुपमा मैदान प्रवेश गरेका फरवार्ड अल्भारो मोराटाले सुन्दर गोल गर्दै खेल १-१ को स्थितिमा ल्याएका थिए ।

निर्धारित ९० मिनेटको खेल १-१ को बराबरीमा सकिएपछि खेल अतिरिक्त समयमा लम्बिएको थियो । इटालीले अब फाइनलमा इंग्ल्यान्ड र डेनमार्क बीच हुने दोस्रो सेमिफाइनलको विजेतासँग खेल्नेछ । दोस्रो सेमिफाइनल बुधबार हुनेछ ।

इटाली दशौं फाइनल खेल्दै

फाइनलमा स्थान बनाएसँगै इटालीले इतिहासमा दशौं पटक ठूलो प्रतियोगिताको उपाधि भिडन्तमा प्रतिस्पर्धा गर्ने भएको छ ।

इटालीले हालसम्म विश्वकपमा ६ पटक र युरोमा ४ पटक फाइनलमा स्थान बनाएको छ । विश्वकपमा ४ पटक उपाधि जितेको इटाली युरोमा भने एक उपाधिमा नै सिमित छ । इटालीले युरोको पछिल्लो दुवै फाइनलमा हार बेहोरेको छ । इटाली पछिल्लोपटक सन् २०१२ मा स्पेनसँग फाइनलमा पराजित भएको थियो ।

इटालीले सन् १९३४, १९३८, १९८२ र २००६ मा विश्वकप उपाधि जितेको थियो । सन् १९७० र १९९४ मा भने इटाली फाइनलमा पराजित हुन पुगेको थियो । दुवै अवसरमा इटाली फाइनलमा ब्राजिलसँग हार्न पुगेको थियो ।

युरोमा भने इटालीले सन् १९६८ मा उपाधि जितेको थियो । सन् २००० मा इटाली फ्रान्ससँग पराजित हुँदै उपाधिबाट बन्चित भएको थियो ।

इटालीले दशौं पटक फाइनल खेल्दा सर्वाधिक फाइनल खेल्ने कीर्तिमान भने जर्मनीको नाममा छ । जर्मनीले हालसम्म युरो र विश्वकप जोडेर १४ पटक फाइनल खेलेको छ ।