गण्डकी प्रदेशका प्रदेश प्रमुख सीताकुमारी पौडेलको स्वकीय सचिवमा विद्यार्थी नेता अर्जुन अधिकारी नियुक्त भएका छन् ।

प्रदेश प्रमुख पौडेलले पोखरा–१९ लामाचौरका अधिकारीलाई स्वकीय सचिवमा नियुक्त गरेको प्रदेश प्रमुखको कार्यालयले जनाएको छ ।

अधिकारी यसअघि स्व. रवीन्द्र अधिकारी पर्यटन मन्त्री हुँदा उनको सचिवालयमा थिए । एमाले निकट अनेरास्ववियुको जिल्ला कमिटी कास्किको अध्यक्ष भैसकेका अधिकारी हाल अनेरास्ववियुको केन्द्रिय सचिवालय सदस्य हुन् । बौद्धिक विद्यार्थी नेतामा गनिने अधिकारीको पब्लिक रिलेशन राम्रो छ । उनी प्रशासकिय कार्यदक्षता र कुशल व्यवस्थापनमा अब्बल मानिन्छन् । उनीसँग पत्रकारिता अनुभव समेत रहेकाले मिडिया मैत्री छन् ।

अधिकारीले गण्डकी प्रदेशको विकासका लागि सबै प्रदेशबासी, राजनीतिक दल तथा नागरिक समाज सकारात्मक रुपमा लाग्नुपर्ने बताए । उनले आफूले प्राप्त गरेको जिम्मेवारी कुशलतापुर्वक पूरा गर्ने विश्वास पनि दिलाएका छन् ।