काठमाडौं । एट्लेटिको मड्रिडले स्पेनिस ला लिगा फुटबलको उपाधि जितेको छ । शनिबार राति भएको खेलमा रियल भालाडोलिडलाई हराउँदै एट्लेटिकोले सात वर्षपछि ला लिगाको उपाधि जितेको हो । जितसँगै एट्लेटिकोले सन् २०१४ पछि पहिलोपटक ला लिगाको उपाधि चुमेको हो ।

भालाडोलिगको मैदानमा भएको खेलमा एट्लेटिकोले पुनरागमन जित निकाल्यो । एट्लेटिकोले भालाडोलिडलाई २–१ ले पराजित गरेको हो ।

खेलको १८औँ मिनेटमा भालाडोलिडका लागि ओस्कार प्लानोले गोल गर्दै टिमलाई अग्रता दिलाएका थिए । पहिलो हाफमा १–० ले पछि परेको एट्लेटिकोले दोस्रो हाफमा दुई गोल गर्‍यो ।

खेलको ५७औँ मिनेटमा एन्जल कोरेयाले एट्लेटिकाका लागि बराबरी गोल फर्काए । ६७औँ मिनेटमा लुइस स्वारेजले गोल गर्दै टिमलाई २–० को जित दिलाए ।

एट्लेटिकोले ३८ खेलबाट ८६ अंक जोड्यो । पराजित भालाडोलिडले ३१ अंक जोड्यो । भालाडोलिड रेलिगेसनमा परेको छ ।

रियलको पुनरागमन जित

स्पेनिस ला लिगा फुटबल अन्तर्गत सिजनको आफ्नो अन्तिम खेलमा रियल मड्रिडले पुनरागमन जित निकालेको छ । शनिबार राति भएको खेलमा रियलले उत्कृष्ट पुनरागमन गर्दै भिल्ला रियलमाथि २-१ गोलको जित निकालेको हो ।

अस्थाई घरेलु मैदानमा एक गोलको अग्रता उल्टाएर रियलले जित निकालेको हो । खेलको २० औं मिनेटमा एरिमी पिनोले गोल गर्दै भिल्लालाई अग्रता दिलाएका थिए । ५५ औं मिनेटमा करिम बेन्जिमाको गोलले मान्यता पाएन । भीएआरमा उनी अफसाइड देखिएका थिए ।

तर, खेलको ८७ औं मिनेटमा बेन्जिमाले गोल गर्दै रियललाई १-१ गोलको बराबरीमा फर्काए । त्यसपछि खेलको इन्जुरी समयको दोस्रो मिनेटमा लुका मोड्रिचले गोल गर्दै रियललाई २-१ को जित दिलाए ।

जितसँगै रियलले सिजनको सुखद अन्त्य गरेको छ । तर, अन्तिम खेलमा जित निकालेपनि रियल उपाधिबाट भने बन्चित भएको छ । रियल च्याम्पियन एट्लेटिको मड्रिड भन्दा २ अंकले पछि पर्यो। दोस्रो स्थानको रियलले ३८ खेलमा ८४ अंक जोड्यो । एट्लेटिकोले ८६ अंक जोड्यो । भिल्ला ५८ अंक जोडेर सातौं स्थानमा रह्यो ।

बार्सिलोनाको सुखद अन्त्य

बार्सिलोनाले स्पेनिस ला लिगा फुटबल अन्तर्गत सिजनको आफ्नो अन्तिम खेलमा जित निकालेको छ । शनिबार राति भएको खेलमा बार्सिलोनाले इबरलाई १-० गोल अन्तरले पराजित गरेको हो ।

बार्सिलोनाको जितमा एन्टोनी ग्रीजम्यान नायक बने । उनले खेलमा निर्णायक गोल गरे । पहिलो हाफ गोलरहित बराबरीमा सकिएको खेलको ८१ औं मिनेटमा ग्रीजम्यानले निर्णायक गोल गरेका हुन् ।

यस जितसँगै बार्सिलोनाले सिजनको सुखद अन्त्य गरेको छ । बार्सिलोना यस सिजन तेस्रो स्थानमा रह्यो । बार्सिलोनाले ३८ खेलमा ७९ अंक जोड्यो । इबर भने पुछारमा रहदै रेलिगेसनमा परेको छ। इबरले यस सिजन ३० अंक जोड्यो ।