कुनै हालतमा पनि नेपाली काँग्रेसलाई समर्थन गर्न नसक्ने चट्टानी अडानमा रहेका राष्ट्रिय जनमोर्चाका सांसद कृष्ण थापाले आज हस्ताक्षर गर्छन् ? उनको सिद्धान्तले जित्छ कि ? पार्टीको निर्देशन भनेर मन नलागी नलागी सही धस्काउँछन् ? एकातिर मानेका नेता छन्, अर्का तिर आफूलाई जिताउने कार्यकर्ता, आफ्नो धरातल, आफ्नो आधार । पार्टीका केन्द्रिय महासचिव नै पोखरा आएर फकाउन थालेको ११ दिन भइसक्यो । उनी अहिले धर्मसंकटमा छन् ।

थापाले यदि हस्ताक्षर नगरे सांसद पद गुम्नेछ भने पार्टीबाटै निश्काषन हुनुपर्ने अवस्थामा पुग्नेछन् । संसदीय दलको ह्वीप उल्लंघन गर्ने, पार्टीको निर्देशन नमान्नेलाई कारबाही प्रक्रिया सुरु हुनु सामान्य रहेको दलले जनाइसकेको छ । गण्डकी प्रदेशसभामा राजमोको ३ सांसद छन् । थापा आफै संसदीय दलका नेता हुन् । यसअघि, पार्टी अध्यक्ष चित्रबहादुर केसीले नै पार्टीको निर्णय नमान्नेलाई कारबाही हुने बताइसकेका छन् ।

पृथ्वीसुब्बा गुरुङलाई विस्थापन गरी कांग्रेसका कृष्णचन्द्र नेपाली पोखरेलको नेतृत्वमा सरकार बनाउन विपक्षी गठबन्धन पहिल्यैदेखि लागेको छ । अविश्वास प्रस्ताव समेत दर्ता भइसकेका बेला वैशाख १५ गते यसको छिनोफानो हुने दिन राजमोकै सांसद खीमविक्रम शाही अनुपस्थित भएपछि पृथ्वीसुब्बाको पदको आयू ११ दिन लम्बिएको थियो । सांसद शाही चरक हस्पिटलमा भेटिएका थिए । विहान नेगेटिभ आएको उनको रिपोर्ट त्यही दिन २ पटक पोजिटिभ आएको जानकारी गराइएको थियो । स्वाब कलेक्शन डेट र छिनछिनमै सिटी भ्यालुमा गडबढका कारण अहिले पनि आशंका नै गर्छन् ।

सांसद शाहीले अहिले पार्टी निर्देशन मानेका छन् । जनमोर्चा सांसद खिमबिक्रम शाही र पियारी थापाले  हस्ताक्षर बुझाइसकेका छन् । समानुपातिक सांसद एवं पार्टी सचेतक पियारी थापा पृथ्वीसुब्बा हटाउने अभियानमै थिइन् । पियारीले नै २ सांसदलाई प्रक्रिया नपुराई ह्वीप लगाएकी थिइन् । २ दिनसम्मको अनवरतको प्रयासमा पनि सांसद थापाले काँग्रेसलाई समर्थन गर्न नमानेपछि कारवाही प्रक्रिया अघि बढाइने भएको छ ।

उनलाई फकाउने प्रयास जारी छ । अन्तिम अवस्थासम्म थापाले पार्टी निर्णय नमाने आजै पदमुक्त गरी सो को जानकारी संसदमा गराउने तयारी पनि गरिएको बताईन्छ । यसो भएमा गण्डकी प्रदेशसभामा सदस्य संख्या ५९ हुन्छ र काँग्रेसका कृष्णचन्द्र पक्षमा बहुमत पुग्छ । काँग्रेसको १५, माओवादीको सभामुखबाहेक ११, जसपाको २ गरी २८ छ । राजमोको २ थपिँदा ३० पुग्छ र बहुमत हुन्छ । एमालेको माधवपक्षका १ सहित २७ र स्वतन्त्र सांसद राजिव गुरुङ (दीपक मनाङे) सहित २८ नै छ । पृथ्वीसुब्बा फेरि मुख्यमन्त्री बन्ने सम्भावना समाप्त हुन्छ ।

राजनीतिक दल सम्बन्धी ऐन २०७३ अनुसार सांसदलाई पार्टीबाट निष्काशन गर्न सक्ने व्यवस्था गरेको छ ।  पार्टीबाट निष्किासित सांसद स्वतः पदमुक्त हुन्छ । कानुनमा कारबाही अघि सांसदलाई स्पष्टिकरण पेश गर्ने मौका दिनुपर्ने उल्लख छ । यसका लागि दलले जाँचबुझ समिति गठन गर्न सक्ने व्यवस्था गरेको छ ।
यसरी लिएको स्पष्टिकरण दलको केन्द्रिय समितिमा पेश गरेर निर्णय गर्नुपर्ने छ ।

आज अपरान्ह ४ बजेसम्म मात्र समय छ । अहिलेसम्म फकाउने अन्तिम कसरतमा रहेका उनीहरुले यो प्रक्रिया पूरा गरिसक्नेमा भने आशंका छ । थापाको आजै पद नगए मुख्यमन्त्रीमा पृथ्वीसुब्बा गुरुङले पुनर्नियुक्ति पाए पनि ३० दिनभित्र विश्वासको मत लिन उनलाई सकस पर्नेछ । त्यसपछि प्रदेशसभा विघटन हुन्छ र मध्यावधि चुनावतर्फ धकेलिनेछ ।