स्वास्थ्य तथा जनसंख्या मन्त्री हृदयश त्रिपाठीले नागरिकको उपचारमा सरकारले हातखुट्टा नछोडेको बताएका छन्। शनिबार साँझ एक भिडियो सन्देश मार्फत मन्त्री त्रिपाठीले यस्तो बताएका हुन् ।

‘सरकार यहाँहरुको साथमा छ। बाहिर प्रचार भएजस्तो सरकारले हातखुट्टा छोडेको छैन’, कोरोना भाइरस संक्रमण तथा रोकथामका लागि सरकारले गरेका प्रयासबारे जानकारी दिँदै मन्त्री त्रिपाठीले भने, ‘सरकार जिम्मेवारीका साथ आफ्नो कर्तव्य पालनाका लागि अगाडि बढेको छ।’

उनले सरकार आतंकित हुने स्थितिमा नभएको र उपचारका सबै विधिका लागि थप काम गरिरहेको दाबीसमेत गरेका छन्। ‘हामी आतंकित हुने स्थितिमा छैनौं’, उनले थपे, ‘सरकार उपचार विधिका लागि थप काम गरिराखेको छ।’ मन्त्री त्रिपाठीले उपत्यकामा कोरोना उपचारका लागि भोलिदेखि नै हजार बेड थप हुने दाबीसमेत गरेका छन्।

सरकार नागरिकको जीवन रक्षाका लागि जिम्मेवारीका साथ कर्तव्य पालनामा खटेको भन्दै उनले खोप र अक्सिजन सिलिण्डर जोहो गर्न आफूहरु दत्तचित्त भएर लागेको बताए। त्रिपाठीले चाँडै आवश्यक औषधि आपूर्ति हुने विश्वास व्यक्त गरे।