पोखरा – शुक्रबार कोरोना संक्रमणका कारण पोखरामा थप दुई जनाको मृत्यु पुष्टि भएको छ।

कास्की जिल्ला पोखरा महानगरपालिका -६ निवासी ८२ वर्षीय संक्रमित महिला र स्याङ्गजा जिल्ला अर्जुन चौपारी गाउँपालिका -५ निवासी ६२ वर्षीय पुरुषको कोरोना संक्रमणका कारण मृत्यु पुष्टि भएको प्रदेश स्वास्थ्य निर्देशनालयका प्रमुख डा. विनोद विन्दु शर्माले जानकारी दिए ।

शर्माका अनुसार गत बैशाख १५ गते कोरोना पोजेटिभ देखिएर उपचारका लागि चरक मेमोरियल अस्पताल भर्ना भएकी पोखराकी महिलाको बिहीबार बेलुका उपचारकै क्रममा मृत्यु भएको हो।

यस्तै गएको बैशाख ५ गते कोरोना पोजेटिभ पुष्टि भएर उपचारका लागि मणिपाल शिक्षक अस्पताल भर्ना भएका स्याङ्गजाका पुरुषको उपचारकै क्रममा बिहीबार राति १२:४५ बजे मृत्यु भएको अस्पतालले जनाएको छ।

आज थप मृतकसंगै गण्डकीमा कोरोना संक्रमणका कारण ज्यान गुमाउनेको संख्या २२३ पुगेको निर्देशनालयले जनाएको छ।