ताप्लेजुङको मेरिङदेन गाउँपालिका–२ सान्थाक्रामा छिमेकीले चलाएको भरुवा बन्दुकको गोली लागि एक जनाको मृत्यु भएको छ ।

बिहीबार साँझ साढे ५ बजे सान्थाक्राको दिदीमागाउँका २९ बर्षीय प्रताप भन्ने आकाश लिम्बूले चलाएको भरुवा बन्दुकको गोली लागेर छिमेकी खड्क आवाजुङ्ग लिम्बूको मृत्यु भएको हो ।

स्थानीय जालपादेवी निम्न माध्यमिक विद्यालयमा कार्यरत ५० वर्षीय लिम्बूलाई घरको आँगनमा निस्किएको समयमा आकाशले लुकीछिपी गोली प्रहार गरेको जिल्ला प्रहरी कार्यालय ताप्लेजुङले बताएको छ । प्रहरीका अनुसार आकाशले एक्कासी बन्दुकले हानी हत्या गरेका हुन् ।

आकाश अहिले प्रहरीको नियन्त्रणमा छन् भने घटनामा प्रयोग भएको भरुवा बन्दुकसमेत नियन्त्रणमा लिइएको प्रहरीले जनाएको छ । आकाशले प्रयोग गरेको भरुवा बन्दुक भने घटनास्थल देखी अन्दाजी ७० मिटर टाढा बारीमा फेला परेको जिल्ला प्रहरी कार्यालय ताप्लेजुङले जनाएको छ ।

उनलाई प्रहरी चौकी सान्थाक्राबाट खटिएको प्रहरी टोलीले नियन्त्रणमा लिएको छ ।आकाशलाई घरदेखि केही तल जङ्गलमा लुकीछिपी बसेको अवस्थामा पक्राउ गरिएको थियो ।

ताप्लेजुङको सान्थाक्रा स्थित स्थानीय नेपाली ख्रीष्टियन सामुदायिक चर्चको पाष्टर समेत रहेका लिम्बुलाई पारिवारिक रिसईविको कारण गोली हानी हत्या गरिएको श्रोतले जनाएको छ । यद्यपी घटनाको यथार्थ कारण भने खुलेको छैन ।