कास्की जिल्लामा बज्रराज अधिकारीको नेतृत्वमा अनेरास्ववियु कास्की जिल्ला कमिटी गठन भएको छ । नेकपा एमाले वरिष्ठ नेता माधव नेपाल समुहले छुट्टै अनेरास्ववियु कमिटि गठन गरेको हो ।

पोखरास्थित पृथ्वीनारायण क्याम्पसमा भएको भेला मार्फत अधिकारीको नेतृत्वमा १ सय ४१ सदस्यीय जिल्ला कमिटीको घोषणा गरिएको थियो ।

भेलामा अनेरास्ववियु केन्द्रिय सचिव राजन शर्मा पराजुलीले अब विद्यार्थी आन्दोलन सरकारी क्याम्पसमा हुने दुई खाले शिक्षाको अन्त्य गर्ने दिशामा अगाडि बढ्ने बताए ।

उनले यातायातमा झैं स्वास्थ्यमा पनि ४५ प्रतिशत छुट दिनुपर्ने गरी आन्दोलनको उठान गर्नुपर्ने र अधुरो रहेको शैक्षिक अनि व्यावसायिक ऋणको प्रभावकारी कार्यान्वयन गर्न अबको बिद्यार्थी आन्दोलन अगाडि बढ्ने उद्घोष् गरे ।

कार्यक्रममा नेकपा एमाले केन्द्रिय सदस्य श्रीनाथ बराल, एमाले कास्की अध्यक्ष तथा पूर्व स्ववियु सभापति धनराज आचार्य, पृथ्वीनारायण क्याम्पसका निवर्तमान स्ववियु उपसभापति तथा एमाले महानगर सचिव सुशील बस्नेत लगायतले बोलेका थिए ।

शंकर सैंजुले अध्यक्षता गरेको कार्यक्रमको संचालन सन्तोष न्यौपाने, स्वागत रसिका भण्डारीले गरेका थिए ।