काठमाडौँ- हिजो बिहीबार काठमाडौँमा पानी छिट्यायो मात्र पर्न सकेन। उता नेपालको पूर्वी भागका केही स्थानमा असिना पर्‍यो। आज शुक्रवार भने देशका विभिन्न क्षेत्रमा वर्षाको सम्भावना रहेको मौसम पूर्वानुमान महाशाखाले जनाएको छ ।

महाशाखाका अनुसार हाल नेपालमा स्थानीय र पश्चिमी वायुको आंशिक प्रभाव छ। नेपालभन्दा दक्षिणमा बनेको तल्लो वायुमण्डलीय न्यून चापीय प्रणालीको पनि यहाँ केही प्रभाव देखिएको छ।

यही प्रभावका कारण शुक्रवार दिउँसो प्रदेश १ का केही स्थान र बाँकी प्रदेशका पहाडी क्षेत्रका केही भूभागमा मेघ गर्जन, चट्याङसहित हल्का वर्षाको सम्भावना रहेको छ। पश्चिमी तथा मध्य पहाडी तथा तराईका केही भूभागमा हल्का तुवाँलो समेत लाग्न सक्ने अनुमान मौसम पूर्वानुमान महाशाखाको छ ।

महाशाखाका अनुसार शनिवार र आइतबार पहाडी भूभागका एक वा दुई स्थानमा वर्षाको सम्भावना छ भने आज राति देशका पहाडी भूभागका एक वा दुई स्थानमा मेघ गर्जन, चट्याङसहित हल्का वर्षाको सम्भावना छ।