चितवनको दासढुंगामा ट्रक र कार आपसमा ठक्कर खाँदा पोखरा लेखनाथका र तनहुँ श्याम्घाका दुई युवकको ज्यान गएको छ । बुधबार दिउँसो मुग्लिन नारायणगढ सडक खण्डको दासढुङ्गामा ट्रक र कार ठोक्किएको हो ।

जिल्ला प्रहरी कार्यालय चितवनका अनुसार मृत्यु हुनेमा कास्कीको पोखरा स्थित लेखनाथका ३१ वर्षीय रामकृष्ण भुजेल र तनहुँ स्याम्घा ४ निवासी २८ वर्षका धर्मराज गौली रहेका छन् ।

नारायणगढबाट मुग्लिङतर्फ जाँदै गरेको ना ६ ख ७३७१ नम्बरको ट्रक र विपरित दिशातर्फ आइरहको बा २१ च ६८५९ नम्बरको कार एक आपसमा ठक्कर खाएको थियो ।

घटनामा परी घाइते कार चालक लमजुङ मध्येनेपाल नगरपालिका ७ निवासी ४२ वर्षका पदम सापकोट, स्याङ्जा बिरुवा गाउँपालिका ३ निवासी ४२ वर्षीय प्रसाद थापा र तनहुँ ब्यास नगरपालिका ६ निवासी ४० वर्षका जसमान परियारको पुरानो मेडिकल कलेज भरतपुरमा उपचार भई रहेको चितवन प्रहरीले जनाएको छ ।

दुर्घटनापछि कारमा सवार चालक सहित पाँचजना घाईते भई उपचारको लागि पुरानो मेडिकल कलेज भरतपुर लैजाँदै गर्दा दुई जनाको बाटोमा नै मृत्यु भएको प्रहरीले बताएको छ ।