काठमाडौं । नेकपाका अध्यक्ष केपी शर्मा ओली र वरिष्ठ नेता माधवकुमार नेपाल पक्षबीच छलफल शुरु भएको छ ।

छलफलमा ओलीसहित उनका तर्फबाट ईश्वर पोखरेल, विष्णुप्रसाद पौडेल, प्रदीपकुमार ज्ञवाली र सुवास नेम्वाङ छन् । अर्कातर्फ नेपालसहित भीम रावल, सुरेन्द्र पाण्डे, घनश्याम भूसाल, र रघुजी पन्त सहभागी छन् । चार महिनापछि ओली र नेपाल बीच भेटवार्ता भएको हो । गएको २५ कात्तिकपछि संवाद टुटेको थियो।

माओवादीसँगको एकतालाई सर्वोच्च अदालतले अमान्य घोषित गरेपछि ओली र माधव नेपाल समूह पहिलोपटक छलफलमा जुटेको हो। नेपाल कम्युनिस्ट पार्टी (ने क पा) अस्तित्वमा नरहेको अदालतको आदेश पछि एमाले र माओवादीका नेता आ-आफ्नै पुरानो पार्टीमा फर्किएका थिए। नेपाल समूह एमालेमा फर्किएसँगै एमाले भित्रको विवाद चर्किएको हो।

शुक्रवार ओलीले आफ्नो समूहको बैठक राखेर नेपाल समूहका नेतालाई पदमुक्त गरेका थिए। नेपाल समूहले भने चैत ४ र ५ गतेका लागि भेला बोलाएको छ। ओलीले पनि चैत ७ गतेका लागि केन्द्रीय कमिटीको बैठक बोलाएका छन्।