युइएफए च्याम्पियन्स लिगमा जर्मन क्लब बोरुसिया डर्टमण्डले अन्तिम आठमा स्थान पक्का गरेको । तर, क्रिस्टियानो रोनाल्डोको टिम युभेन्टस् भने अन्तिम १६ बाटै बाहिरिएको छ ।

लिगअन्तर्गत गएराति भएका अन्तिम १६ को दोस्रो लेगमा डर्टमण्डले सेभिल्लालाई पारजित गर्दै अन्तिम ८ मा स्थान बनाएको हो । युभेन्टस भने पोर्चुगिज टोली एफसी पोर्टोसँग पराजित हुँदै लिगबाट बाहिरिएको छ ।

गएरातिको दोस्रो लेगमा डर्टमण्डले स्पेनिस क्लब सेभिल्लासँग २-२ गोलको बराबरी खेल्यो । तर, पनि समग्रमा ५-४ गोल अन्तरका साथ डर्टमण्ड क्वाटरफाइनलमा पुगेको छ ।

डर्टमण्डका लागि इर्लिङ हालान्डले दुवै गोल गरे । उनले खेलको ३५औँ पहिलो गोल तथा ५४औँ मिनेटमा पेनाल्टीमार्फत हालान्डले दोस्रो गोल गरे । यता सेभिल्लाका लागि युसुफ निसेरीले ६८औँ र अतिरिक्त समयमा गोल गर्दै खेल बराबरी गरे ।

तर, पहिलो लेगमा आफ्नै मैदानमा सेभिल्ला डर्टमण्डसँग ३-० ले पराजित भएको थियो । जसका कारण सेभिल्ला बाहिरियो भने डर्टमण्ड समग्रमा ५-४ गोल अन्तरका साथ क्वाटरफाइनल पुग्न सफल भयो ।

यता, इटालियन जायन्ट युभेन्टसले पोर्टोलाई दोस्रो लेगमा ३-२ गोल अन्तरले पराजित गरेपनि समग्रमा अवे गोलका आधारमा पोर्टोले क्वाटरफाइनल यात्रा तय गर्यो । पहिलो लेगमा पोर्टोले युभेन्टसलाई २-१ गोल अन्तरले पराजित गरेको थियो थियो ।

युभेन्टसको मैदानमा सर्जियो अलिभिएराले पेनाल्टीमा गोल गर्दै पोर्टोलाई १९औँ मिनेटमा सुरुवाती अग्रता दिलाएका थिए । ४९औँ मिनेटमा फेडेरिको किएजाले युभेन्टसका लागि बराबरी गोल गरेका थिए ।

किएजाले ६३औँ मिनेटमा गोल गर्दै २–१ ले युभेन्टसलाई अघि बढाए पनि समग्रमा खेल भने बराबरीमा ल्याएका थिए । त्यसपछि अतिरिक्त समयको ११५औँ मिनेटमा पोर्टोका लागि सर्जियोले तथा ११७औँ मिनेटमा युभेन्टसका लागि एड्रियन राविअटले गोल गरे ।

त्यसपछि दुवै लेग समग्रमा ४–४ गोलको बराबरीमा टुंगिएपनि युभेन्टस अन्तिम आठको यात्रा तय गर्न असफल भयो । युभेन्टसको घरमा धेरै गोल गरेकाले अवे गोलका आधारमा पोर्टो अन्तिम ८ मा पुग्न सफल बन्यो ।