पोखरा नदिपुर स्थित न्यू ग्यालेक्सी माविमा अध्ययनरत १७ वर्षीया अन्वेशा पौडेलको दुर्घटनामा निधन भएको छ । पृथ्वी राजमार्गअन्तर्गत तनहुँको आँबुखैरेनीमा हिजो भएको मोटरसाइकल दुर्घटनामा उनको निधन भएको हो । चितवनस्थित आफन्तको घरबाट पोखरा फर्कने क्रममा सो दुर्घटना भएको हो । उनको घर लमजुङको मध्यनेपाल नगरपालिका ६, भोर्लेटार हो ।

शनिबार बिहान ८ बजे ना १९ प ९२४ नम्बरको मोटरसाइकलाई आफ्नै दिशाबाट आउँदै गरेको भारतीय नम्बर प्लेटको एनएल ०१ एन २९८६ को ग्यास बुलेटले ठक्कर दिएकोमा मोटरसाइकल विपरीत दिशाबाट आउँदै गरेको ग ३ च २०८४ नं. को कारमा ठोक्किन पुगेको थियो ।

दुर्घटनामा मोटरसाइकल पछाडि बस्ने अन्वेशाको घटनास्थलमै मृत्यु भएको जिल्ला प्रहरी प्रमुख अरुण पौडेलले जानकारी दिए । घटनाको विषयमा अनुसन्धान भइरहेको प्रहरीले जनाएको छ । मोटरसाइकल चालक चितवन भरतपुरका ५१ वर्षीय युवराज घिमिरे सामान्य घाइते भएका छन् ।

यसैबीच, शनिबार नै पोखरा २५ याम्दीमा ट्याक्सी र स्कुटर ठोक्किँदा स्कुटर चालक घाइते भएका छन् । ध १ ज ९८८ नं. को ट्याक्सी र ग १७ प ९१६२ नं। को स्कुटर ठोक्किँदा स्कुटर चालक स्याङ्जा पुतलीबजार ९ लामागेका ४० वर्षीय श्रीकृष्ण भण्डारी घाइते भएका हुन् । उनको मणिपाल शिक्षण अस्पतालमा उपचार भइरहेको प्रहरी नायव उपरीक्षक राजकुमार थिङले जनाए ।