२६ औं जनयुद्ध दिवसको अवसरमा अनेरास्ववियू पृथ्वीनारायण क्याम्पस कमिटिले शनिबार साँझ दीप प्रज्वलन गरेको छ । क्याम्पस गेटमा जम्मा भई विद्यार्थीले जनयुद्धका क्रममा ज्यान समर्पण गर्ने सहिदलाई स्मरण गर्दै मैन बत्ती बालेका हुन् ।

दीप प्रज्वलनपछि आयोजित कोणसभामा बोल्दै अनेरास्ववियूका केन्द्रिय सदस्य राजन शर्मा पराजुलीले सहिदको बलिदानी पश्चात् प्राप्त उपलब्धिलाई कुल्चँदै केपी शर्मा ओली अघि बढेको भन्दै सहिदको रगत र आत्माको श्रापले सुख नदिने बताए ।

‘सच्चिनुस्, सत्ताको मातमा सहिदको सपना लत्याउनुहुन्छ भने सडकमा ल्याउनु नपरोस् । यो सन्देश प्रचण्ड र माधव नेपाललाई पनि हो । तपाईंहरु भोलि सत्तामा पुगेर पनि यस्तै नगर्नुहोस् । सहिदका सपनामाथि कुठाराघात गर्नुहुन्छ भने सबै विरुद्ध अनेरास्ववियुले आवाज बुलन्द गर्नेछ ।’ – उनले भने ।

कार्यक्रममा सहिद परिवारका तर्फबाट विद्यार्थी नेता त्रिदीप गुरुङले मुलुक परिवर्तनका लागि सहिदहरुले आफ्नो ज्यान दिएपनि अहिले नेताहरुले मुलुक र जनताप्रति गद्धारी गरेको बताए ।

पार्टीका स्याङ्जा जिल्ला कमिटि सदस्य टीकाराम नेपाली, कास्कीका आमन्त्रित जिल्ला सदस्य नारायण बास्तोला लगायतले बोलेका थिए । अनेरास्ववियू कास्की जिल्ला सहसंयोजक बसन्त भट्टचन, पृथ्वीनारायण क्याम्पस कमिटि कार्यवाहक अध्यक्ष सन्तोष न्यौपाने, विद्यार्थी नेता प्रेम बुढा मगर लगायतको सहभागिता रहेको थियो ।