काठमाण्डौ । प्रधानमन्त्री केपी शर्मा ओलीले जनमतको धज्जी उडाउँदै प्रतिनिधिसभा विघटन गरेको विरुद्ध चरणवद्ध आन्दोलन गर्दै आएको उनकै पार्टी नेकपाको प्रचण्ड-माधव समूहले भोलि आम हड्ताल आयोजना गरेको छ ।

प्रतिनिधिसभा विघटन गरि संसदीय सुनुवाइ बिना नै पदाधिकारी नियुक्त गरेर मुलुकमा विधिको शासनलाई चुनौती दिइएकाले आकस्मिक रुप्मा आमहडताल घोषणा गर्न बाध्य भएको सो पार्टीले जनाएको छ ।

‘हामी सरकारको कदमविरुद्ध आमहड्तालजस्तो कार्यक्रम गर्न बाध्य भयौँ, त्यसका लागि हामी क्षमा चाहन्छौँ’, पत्रकार सम्मेलनमा नेत्री पम्फा भुसालले भनिन् ‘ आज (बुधबार) साँझ मशाल जुलुसको कार्यक्रम राखिएको छ ।’

बन्दका क्रममा यातायात, पसल, कलकारखाना सबै बन्द रहनेछ । स्वास्थ्य तथा अत्यावश्यक वस्तु आयात गर्ने साधनहरु भने चल्न दिने जानकारी दिइन्। दुध बोक्ने गाडी, प्रेसका सवारी, एम्बुलेन्स लगायतका अत्यावश्यकीय साधन सबै चल्न पाउनेछन् । यसबाहेक अरु सबै बन्द हुनेछन् ।