पृथ्वीराजमार्ग अन्तर्गत धादिङको थाक्रे गाउँपालिका वडा नं. २ कोइरालेमा दुई वटा ट्रक एकआपसमा ठक्कर खाँदा दुई जनाको मृत्यु भएको छ भने दुई जना गम्भीर घाइते भएका छन् ।

मुग्लिङ तर्फबाट काठमाडौं जाँदै गरेको लु २ ख २७० नम्बरको ट्रकले बिग्रेर रोकिराखेको ना ६ ख ६४६५ नम्बरको ट्रकमा पछाडिबाट ठक्कर दिँदा दुर्घटना भएको इलाका प्रहरी कार्यलय गजुरीका प्रहरी निरिक्षक भोजराज पाण्डेले जानकारी दिए ।

दुर्घटनामा परी मृत्यु हुनेमा ट्रकका सहचालक संखुवासभा घर भएका किरण कार्की र ट्रकमा सवार बर्दियाका सानोसुकी गाउँपालिका वडा नं ९ का किरण प्रताप गुरुङ्ग रहेका छन् । उनीहरुको घटनास्थलमै मृत्यु भएको थियो ।

त्यस्तै, घटनामा चालक नवलपरासीको सुनवाल नगरपालिका वडा नं ६ का लिलाराम अधिकारी र बाराको करैया गाउँपालिका वडा न ४ बस्ने कमल शाह पनि गम्भीर घाइते भएका छन्। उनीहरुलार्इ स्थानीय र प्रहरीले उद्धार गरी उपचारको लागि काठमाडौं स्थित ट्रमा सेन्टरमा पठाइएको प्रहरीले जानकारी दिएको छ ।

गएराति साढे ३ बजे भएको दुर्घटना भएपछि घाइते भएर च्यापिएका चालकलाई निकाल्न प्रहरीलाइ २ घण्टा भन्दा बढी समय लागेको थियो । ट्रक तीव्र गतिमा रहेको र चालक निदाएको कारण दुर्घटना भएको हुनसक्ने प्रारम्भिक अनुमान छ ।

• तस्वीर पाविल न्यूजबाट