पोखरा – शुक्रबार पोखराका १९ सहित गण्डकीमा थप २८ जनामा कोरोना पुष्टि भएको छ ।

प्रदेश स्वास्थ्य निर्देशनालयद्वारा जारी विज्ञप्ति अनुसार आज गण्डकीका ११३ जनामा गरिएको परीक्षणमा थप २८ जनाको रिपोर्ट पोजेटिभ आएको हो ।

आज पुष्टि भएका संक्रमित गण्डकीका पाँच जिल्लाका छन् । जसअन्तर्गत कास्कीको पोखरा महानगरका १९ जना, तनहुँका २ जना, लमजुङका १ जना, बाग्लुङका २ जना र म्याग्दी जिल्लाका ४ जनाको रिपोर्ट कोरोना पोजेटिभ आएको निर्देशनालयले जनाएको छ ।

आज थपिएका संक्रमित संगै गण्डकीमा कोरोना संक्रमितको कूल संख्या १५ हजार ५०६ पुगेको छ । जसमा सक्रिय संक्रमित ४०९ छन् ।

पछिल्लो २४ घन्टामा गण्डकीबाट ५३ जना कोरोनामुक्त भएका छन् । यो संगै, प्रदेशमा कोरोना मुक्त हुनेको संख्या १४ हजार ८ सय ९४ पुगेको छ भने, हालसम्म प्रदेशमा कोरोना संक्रमणका कारण १०३ जनाले ज्यान गुमाईसकेका छन्  ।