पोखरा । नेकपा प्रचण्ड–माधव समूहका अध्यक्ष पुष्पकमल दाहाल प्रचण्डले प्रधानमन्त्री पदका लागि केपी शर्मा ओलीले जनताको बहुदलीय जनवाद (जबज) छोड्ने सम्झौतामा सुरुमा हस्ताक्षर गरेको बताएका छन् । पोखरामा आयोजित प्रदेश स्तरीय कार्यकर्ता भेलामा प्रचण्डले प्रधानमन्त्री प्राप्त गर्नका लागि ओलीले ‘राजनीतिक बेइमानी’ गरेको बताए ।

पार्टी एकताका क्रममा जबज छोड्न नहुने भन्दै माधवकुमार नेपालले कुरा राखेको र पूर्वमाओवादीका केही नेताले पनि २१औँ शताब्दीको जनताको जनवाद राजनीतिक सिद्धान्त राख्नुपर्छ भनेर कुरा राखेको अवस्थामा ओलीले नै जबज छोड्न तयार भएपछि कुरा मिलेको प्रचण्डको भनाई थियो ।

उनले थपे,’अन्तिममा केपी ओली र म छलफल गर्दा मदन भण्डारीको भूमिका र जबज छोडेर समाजवाद उन्मुख जनताको जनवाद भन्ने सिद्धान्तमा पहिला हस्ताक्षर गरेको केपी ओलीले नै हो । सबैले त्यसलाई समर्थन गरेर अगाडि बढ्दा पार्टी एकता भयो । आज के देखियो भने उहाँले जबज छोडेको र समाजवाद उन्मुख जनताको बहुदलीय जनवादमा हस्ताक्षर गरेको प्रधानमन्त्री पद प्राप्त गर्नका लागि मात्रै रहेछ ।’

केपी ओलीभन्दा माधवकुमार नेपाल हजार गुणा इमान्दार भएको प्रचण्डको भनाई छ । माधव नेपाललाई पञ्चायत विराधी आन्दोलनबाटै चिनेको भन्दै उनले थपेः ‘केपीभन्दा माधव नेपाल हजार गुणा इमान्दार, हजार गुणा पारदर्शी, हजार गुणा सुशासनको पक्षधर छन् । प्रचण्डले माधव नेपाल ओलीभन्दा हजार गुणा बढी क्रान्तिकारी भएको समेत बताए । गणतन्त्रबारे ओलीको धारणा सबैले बुझेको बताउँदै प्रचण्डले भने, ‘केपी ओलीको उद्देश्य इमान्दारिताको रहेनछ । नाङ्गै हुने छलछामको तरिका अपनाउने रहेछ ।’

प्रचण्डले अहिले मन्त्री पद पाउने स्वार्थका कारण जनयुद्ध लडेर आएका पूर्वमाओवादीहरु ओली समूहमा लागे पनि केही महिनापछि पुरानै घरमा फर्किने बताए । उनले भने, ‘जनयुद्ध कुहिएको आलु हो भनेर ओलीले भनिरहँदा पूर्वलडाकुले कसरी मन बुझाएका होलान् ? ओलीको जयजय कसरी गर्न सके मलाई धिक्कार उनीप्रति लाग्यो ।’ आफूहरुको विजयीको सुरुआत भएको बताउँदै उनले सबैभन्दा ठूलो अदालत जनता नै रहेको बताएका थिए । ओलीको टुक्का र उखानको परास्त गर्न केही समय सडकमै हुनुपर्ने उनको भनाइ थियो ।

प्रचण्डले कसैले भन्दैमा एकता नबिग्रने बताए । ‘म माधवको पक्षमा गएकै हो । त्यसो भनेर के बिग्रन्छ रु माधवजी मेरो पक्षमा, म माधवजीको पक्षमा । एकता गरेको हो नि हामीले, ओर्जिनल सहमति हो’, प्रचण्डले भने । आफूहरु जालझेल गर्नेको पक्षमा नरहेको पनि उनले बताए । तर, ओलीले भने पार्टी एकता पछि बसेको पहिलो स्थायी कमिटी बैठकबाटै घच्याकघुच्चुक गर्न थालेको बताए ।

माओवादी र एमाले एकीकरणमा वामदेव गौतमको महत्वपूर्ण भूमिका रहेको उनले बताए । वामदेवकै पहलकदमीमा पार्टी एकीकरण अगाडि बढेको पनि प्रचण्डले बताए । ‘एकताको प्रस्ताव लिएर म गएको हो, केपी ओली आएको होइन तपाईँहरुलाई प्रष्ट होओस्’, प्रचण्डले भने । तर, ओलीले झुट बोल्ने गरेको पचण्डले बताए । त्यसबारे वामदेव गौतमले भनेपछि झनै प्रष्ट भएको पनि बताए ।

प्रचण्डले जनमतको कदर गर्न पनि संसद् पुनस्स्थापना हुनुपर्ने बताए । कसैको प्रभावमा नपरी निर्वाचन आयोग र सर्वोच्च अदालतले स्वतन्त्ररुपमा फैसला गर्नेमा आफू विश्वस्त रहेकाले कार्यकर्तालाई पनि विश्वस्त रहनेमा ढुक्क हुन सुझाएका दिए । नेताहरुलाई धम्काउने र धर्काउने शैलीमा ओली प्रस्तुत भएको उनको भनाइ छ । ‘ओली आफ्नो स्वार्थले दलदलमा फसे, अब उठ्ने अवस्थै छैन’, उनले भने, ‘जहिलै पार्टीको विधि र विधान बाहिर रहेर संविधानमाथि ुकुु गर्दै काम गरेका छन् । भ्रष्टाचारमा नेपाल पहिलोमा आयो यसलाई रोक्नुभन्दा भ्रष्टाचारीको संरक्षण गरेका छन् । यसो गर्न हुँदैन भन्यौं । यदि गल्ती नसच्याउने हो भने, हामी दलको नेताबाट हटाउँछौ भनेर भनेका थियौं । पार्टीभित्र सल्लाह भएको थियो । उनले प्रधानमन्त्री पद त्याग्नपर्छ भनेर संसद् नै विघटन गराइदिए ।’ नेकपाको आधिकारिक पार्टी आफ्नो भएको र सूर्य चुनाव चिन्ह पनि आफूहरुलाई नै मिल्नेमा उनी ढुक्का छन् ।

ओलीमा पहिलेदेखि नै गुटवादी र स्वार्थ देखिएकाले पार्टी एकतामा समस्या भएको उनले बताए । ‘कहिले सुस्त र कहिले उग्ररुपमा विवाद बाहिर नआएको होइन’, दाहालले थपे, ‘ओलीलाई विधि र विधानका कुरा गर्‍यो रिस उठिहाल्छ । विवाद चर्किहाल्छ ।’ उनले आफूहरुप्रति ७० प्रतिशत बहुमत रहेको दाबी गरे ।