नेपाल कम्युनिस्ट पार्टी (नेकपा) का अध्यक्षद्वय पुष्पकमल दाहाल ‘प्रचण्ड’ र माधवकुमार नेपाल मंगलबार पोखरा आउँदैछन् ।

गण्डकी प्रदेशस्तरीय नेता-कार्यकर्तालाई प्रशिक्षण दिन अध्यक्षद्वय पोखरामा आउन लागेका हुन् । उनीहरुसँगै प्रवक्ता नारायणकाजी श्रेष्ठ पनि सहभागी हुँदैछन् । पोखरा महानगरपालिका ११ शीतलादेवीस्थित एसआर केसी बैंक्युटमा बिहान ११ बजेदेखि भेला सुरु हुने जनाइएको छ । त्यसअघि बिहान साढे ८ बजे पत्रकार भेटघाट कार्यक्रम राखिएको छ । 

कास्की जिल्ला स्तरीय भेलालाई यसअघि  प्रचण्ड–नेपाल पक्षका नेता योगेश भट्टराई र देवेन्द्र पौडेलले सम्बोधन गरेका थिए । ओली पक्षको भेला पनि आज तनहुँमा भएको छ । भेलालाई ऊर्जामन्त्री टोपबहादुर रायमाझी, पूर्वमन्त्री खगराज अधिकारी, गण्डकी प्रदेशका मुख्यमन्त्री एवं पार्टी इन्चार्ज पृथ्वीसुब्बा गुरुङ, प्रदेश अर्थमन्त्री किरण गुरुङ, राष्ट्रियसभा सदस्य भगवती न्यौपाने लगायतले सम्बोधन गरेका छन् ।

पार्टी फुटसम्मको अवस्थामा पुगिसकेपछि दुई खेमा देशभर भेला गर्दै हिँडेको छ ।