इंग्लिस प्रिमियर लिग फुटबलअन्तर्गत गएराति सम्पन्‍न खेलमा चेल्सीले सहज जीत हात पारेको छ । घरेलु मैदानमा भएको खेलमा चेल्सीले वेस्टह्‍याम युनाइटेडलाई ३-० ले हराएको हो ।

चेल्सीको जीतमा टामी अब्राहमले दुई तथा थियागो सिल्भाले एक गोल गरे । पहिलो हाफमा एक तथा दोस्रो हाफमा दुई गोल भएका थिए ।

गोल फर्काउन प्रयासरत वेस्टह्‍यामले केही अवसरहरु पाएपनि कुनैमा चेल्सीका गोलरक्षक र डिफेन्डर बाधक बनेका थिए भने केही प्रहारले पोस्टको दिशा लिन सकेन ।

जीतसँगै चेल्सी १४ खेलबाट २५ अंक जोड्दै पाँचौं स्थानमा रहेको छ भने पराजित वेस्टह्‍याम २१ अंकसहित १०औं स्थानमा छ ।

बर्नलीले वुल्भसलाई हरायो

गएराति नै भएको अर्को खेलमा बर्नलीले वुल्भरह्‍याम्पटन वान्डर्रसमाथि २-१ को जीत निकालेको छ ।

घरेलु मैदानमा भएको खेलमा बर्नलीलाई जिताउन एसले बार्नस र क्रिस वूडले १-१ गोल गरे । वुल्भसका फाबियो सिल्भाले अन्त्यतिर पेनाल्टीमार्फत् फर्काएको गोल सान्त्वना बन्यो ।

यस जीतले बर्नली १३ अंक जोड्दै १६औं स्थानमा उक्लिएको छ भने पराजित वुल्भ्स २० अंकसहित ११औं स्थानमा छ ।