पोखरा । प्रभु लाइफ इन्स्योरेन्स गण्डकी प्रदेशले जिल्ला ट्राफिक कार्यालय कास्कीलाई १ सय थान स्वास्थ्य सामग्रीसहितको झोला प्रदान गरेको छ ।

इन्स्योरेन्सको चौंथो वार्षिकोत्सवको अवसरमा जिल्ला प्रहरी कार्यालयमा आयोजित कार्यक्रममा उक्त सामग्री हस्तान्तरण गरिएको हो ।

प्रभु लाइफ इन्स्योरेन्स गण्डकी प्रदेश प्रमुख दुर्गानाथ पहारीले जीवन बिमाको महत्व स्पष्ट पारे । कम्पनीले आफ्नो ग्राहकको आर्थिक जोखिम बहन सँगै संस्थागत सामाजिक उत्तरदायित्व अन्तर्गत विभिन्न सामाजिक कार्यहरु गर्दै आएको उनले बताए ।

कास्की प्रहरी प्रमुख जीवनकुमार श्रेष्ठले अहिलेको विषम परिस्थितिमा अग्रपंक्तिमा रही सेवा गर्ने प्रहरी कर्मचारीप्रति प्रभु लाइफले गरेको सहयोगको प्रशंसा गरे । उनले स्वास्थ्य मापदण्ड पालना गरी सुरक्षित ढंगबाट कामकाज गर्न आग्रह गरे ।

उनले भने, ‘आवश्यक परेको खण्डमा कास्की प्रहरी जुनसुकै अवस्थामा पनि सहयोग गर्न प्रतिबद्ध छ ।’ कार्यक्रम सञ्चालन बगर शाखा प्रमुख सुमन पहारीले गरेका थिए ।