काठमाडौं – मोरङमा एकजना शिक्षकको गोली हानी हत्या भएको छ । मोरङ प्रहरीले दिएको जानकारी अनुसार निक्लाजुङ वडा नम्बर १ बर्खेका ५४ वर्षिय शिक्षक राजेन्द्र श्रेष्ठको गोली हानी हत्या भएको हो ।

बिहान सवा ६ बजेतिर चार-पाँच जनाको संख्यामा आएका विप्लव समूहका कार्यकर्ताले शिक्षकलाई घरबाट उठाएर लगेका थिए । घरदेखि करिब ३० मिनेट टाढा जंगलमा लगेर उनको हत्या भएको प्रहरीले जनाएको छ ।

हत्याको घटनाबारे खबर प्राप्त हुनासाथ प्रहरी परिचालन गरिएको छ । ईलाका प्रहरी कार्यालय उर्लाबारी, ईलाका प्रहरी कार्यालय लेटाङबाट प्रहरी टोली घटनास्थलतर्फ लागेको जिल्ला प्रहरी कार्यालय मोरङले जानकारी दिएको छ । शिक्षकको हत्या विप्लव समूहले किन गरेको भन्नेबारे केही खुलेको छैन ।

लामो जनयुद्ध अन्त्यपछि देशमा शान्ति कायम भएको बेला विप्लव समूह जनताको मन जित्नुपर्ने ठाउँमा जनताकै हत्यामा किन उत्रियो ? भन्दै अहिले सामाजिक सञ्जालमा चिन्ता व्यक्त गरिएको छ ।