पोखरा – कास्की प्रहरीले भाँडापसलमा चोरी गर्ने दुई जनालाई सामान सहित पक्राउ गरेको छ ।

पक्राउ पर्नेमा तनहुँ जिल्ला शुक्लागण्डकी नगरपालिका वडा नं -७ घर भई हाल पोखरा -९ पृथ्बीचोक बस्दै आएका १९ वर्षीय सुजन तामाङ र सोही ठेगाना भएका १९ वर्षीय मनिष खड्का रहेको कास्कीका प्रहरी नायव उपरीक्षक तथा प्रहरी प्रवक्ता सुवास हमालले जानकारी दिए ।

प्रवक्ता हमालका अनुसार उनीहरुले गत कार्तिक १९ गते बिहान ५:३० बजेको समयमा पोखरा महानगरपालिका -६ स्थित गंगाधर दवाडीले संचालन गरेको भाँडापसलको सटर फोडेर काँचको कचौरा १२० थान, काँचको थाल ७ थान र नगद तीस हजार समेत चोरेर भागेका थिए ।

पसल चोरिएको सुचनाका आधारमा जिल्ला प्रहरी कार्यालय तथा मातहत वडा प्रहरी कार्यालय बैदामबाट खटिएको प्रहरीको टोलीले खोजतलास तथा अनुसन्धान गर्ने क्रममा पोखरा -६ शान्तिपाटनबाट चोरिएका सामान कांचको कचौरा ६७ वटा , काँचको थाल ४ वटा, नगद नौ हजार छ सय सहित उनीहरुलाई पक्राउ गरेको हो ।

पक्राउ परेका दुवै जनामाथि चोरी तथा डाँका कसूर अन्तर्गत आवश्यक अनुसन्धान भइरहेको प्रवक्ता हमालले जानकारी दिए ।