पोखरामा आज पनि कोरोना संक्रमणका कारण २९ वर्षीया युवतीको ज्यान गएको छ । पोखरा वडा नं. १७ की युवतीको शुक्रबार उपचारकै क्रममा दिउँसो २ः२३ बजे चरक मेमोरियाल अस्पताल पोखरामा उपचारकै क्रममा मृत्यु भएको हो । उनको कार्तिक १६ गते संक्रमण पुष्टि भएको थियो ।

हिजो मात्रै बाग्लुङ जिल्ला जैमिनी नगरपालिका ९ का २९ वर्षकै युवकको पनि ज्यान गएको थियो । उनमा पनि कुनै दीर्घ रोग थिएन । कोरोना संक्रमण पुष्टि भएका युवकलाई निमोनिया भएको थियो भने आज युवतीको बारे भने केही खुलाइएको छैन ।

यस्तै, नवलपुर जिल्ला, गैंडाकोट नगरपालिका १२ का ८२ वर्षीय संक्रमित पुरुषको पनि शुक्रकार २ बजे चितवन मेडिकल कलेजमा उपचारकै क्रममा निधन भएको छ । १८ गते संक्रमण पुष्टि भएका वृद्धमा आन्द्रासम्बन्धी समस्या रहेको गण्डकी प्रदेश स्वास्थ्य निर्देशनालयले जनाएको छ ।

कोरोनाको कारण अहिलेसम्म प्रदेशमा १०२ जनाको मृत्यु भइसकेको छ ।