नेपाल सरकारले अब कोरोनाको उपचार गर्न सक्दिनँ भनेर हात ठडायो । गण्डकी, लुम्बिनी र प्रदेश १ सरकारले भने आफै गर्छु भन्यो । प्रधानमन्त्री ओली सरकारको चर्को आलोचना हुँदा मुख्यमन्त्री गुरुङ नेतृत्वको प्रदेश सरकारले भने वाहवाही पनि कमायो ।

तर गण्डकी प्रदेशमा पनि कोरोनाको उपचार खर्च बिरामी आफैले बेहोर्नुपर्ने भएको छ । कोरोनाको उपचार गरिरहेको पोखरा स्वास्थ्य विज्ञान प्रतिष्ठान अन्तर्गतको पश्चिमाञ्चल क्षेत्रीय अस्पताल पोखराले कोरोनाको उपचारको खर्च बिरामी आफैले बेहोर्नुपर्ने भन्दै सूचना निकालेको हो । यो अस्पताल संघ मातहत नै छ ।

प्रदेशकै राजधानी पोखरामा सरकारी अस्पतालका निर्देशक डा. अर्जुन आचार्यले विहीबार सूचना निकाल्दै कोरोनाको उपचार खर्च बिरामी आफैले बेहोर्नुपर्ने जनाएका हुन् । यो कार्तिक ४ गतेदेखि नै लागू भएको आचार्यद्वारा जारी विज्ञप्तीमा जनाइएको छ । विज्ञप्तीमा क्यान्टिनबाट खाने खाजा तथा खानाका लागि धरौटीसमेत राख्नुपर्ने उल्लेख छ ।

प्रदेशका मुख्यमन्त्री पृथ्वीसुब्बा गुरुङले कोरोनाको उपचार खर्च प्रदेश सरकारले बेहोरिरहेको बताएका थिए ।